ހައުސިންގ މިނިސްޓްރީގެ ސްޓޭޓް މިނިސްޓަރ އިބްރާހިމް ނާޒިމް ވިދާޅުވެފައިވަނީ، ފްލެޓް ލިސްޓާ ގުޅޭގޮތުން ހުށަހެޅޭ ޝަކުވާތަކުގައި އެކަށީގެންވާ ހެކި ހުށަހެޅިއްޖެނަމަ، އެ މައްސަލަތައް ފުރިހަމައަށް ދިރާސާކޮށް ވެރިފައި ކުރެވޭނެ ކަމަށެވެ.
ދައުލަތުގެ މީޑިއާއަށް ދެއްވި ޚާއްޞަ އިންޓަވިއުއެއްގައި ސްޓޭޓް މިނިސްޓަރ ފާހަގަކުރެއްވި ގޮތުގައި، އެންމެ ފަހުން އާންމުކުރެވުނު ފްލެޓް ލިސްޓަށް އަންނާނެ ބަދަލުތަކާ ބެހޭ ގޮތުން މި ވަގުތު ވަކި އެއްޗެއް ދެންނެވެން ނެތް ނަމަވެސް، ޝަކުވާ ހުށަހެޅުމުގެ ފުރުސަތު ހުޅުވާލާފައިވަނީ ރައްޔިތުންގެ ކަންބޮޑުވުންތަކަށް އިޖާބަދިނުމުގެ ގޮތުންނެވެ.
“ސަރުކާރުގެ ނިންމުމާމެދު ހިތްހަމަނުޖެހޭ ފަރާތްތަކަށް އެކަން ޗެލެންޖު ކުރުމުގެ ފުރުސަތު ދިނުމަކީ ޝަކުވާ ހުށަހެޅުމުގެ މަރުޙަލާގެ މައިގަނޑު މަޤްޞަދު،” ސްޓޭޓް މިނިސްޓަރ ވިދާޅުވިއެވެ.
މިނިސްޓްރީން ކަނޑައަޅާފައިވާ އުސޫލުތަކާ އެއްގޮތަށް ހެކިތަކާއެކު ހުށަހެޅޭ ޝަކުވާތައް ވަރަށް ތަފްސީލީކޮށް ދިރާސާކުރެވޭނެ ކަމަށާއި، މި ދިރާސާތަކުގެ އަލީގައި ލިސްޓަށް ބަދަލުތަކެއް އަތުވެދާނެ ކަމަށްވެސް އެމަނިކުފާނު ފާހަގަކުރެއްވިއެވެ.
ގެދޮރުވެރިކުރުމުގެ ސްކީމްގެ ދަށުން 4000 ފްލެޓަށް ޝަރުތު ހަމަވާ ފަރާތްތަކުގެ ލިސްޓް މުރާޖަޢާކުރުމަށްފަހު، އައު ލިސްޓެއް ވަނީ މިދިޔަ މަހުގެ 27 ވަނަ ދުވަހު އާންމުކޮށްފައެވެ. މި ލިސްޓަށް ޝަކުވާ ހުށަހެޅުމުގެ ފުރުސަތު މި މަހުގެ ނިޔަލަށް ހުޅުވާލާފައިވާއިރު، މިހާތަނަށް ގިނަ އަދަދެއްގެ ރައްޔިތުން ވަނީ ޝަކުވާ ހުށަހަޅާފައެވެ.
ކިޔުންތެރިންގެ ހިޔާލު