ޔުއެފާ ޗެމްޕިއަންސް ލީގުގެ ދެވަނަ ބުރުގައި ރޭ ބެންފީކާއާ ދެކޮޅަށް ކުޅުނު މެޗުގައި، ބާސެލޯނާއިން 1-0 ގެ ނަތީޖާއެއް ހޯދައިފިއެވެ. މި ކާމިޔާބީ ހޯދީ މެޗުގެ ގިނަ ވަގުތު 10 ކުޅުންތެރިންނާއެކު ކުޅެންޖެހުމުންވެސް މެއެވެ.

ބެންފީކާގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައެވެ. ނަމަވެސް ބާސެލޯނާއަށް ގޮންޖެހުންތަކާ ކުރިމަތިލާން ޖެހުނީ މެޗުގެ 22 ވަނަ މިނިޓުގައި އެ ޓީމުގެ ޒުވާން ކުޅުންތެރިޔާ ޕައު ކުބާސީއަށް ރަތް ކާޑު ދައްކައި ދަނޑުން ބޭރުކުރުމާ ގުޅިގެންނެވެ.

ކުބާސީއަށް ސީދާ ރަތް ކާޑު ދެއްކީ އެންމެ ފަހު ކުޅުންތެރިޔާގެ ގޮތުގައި ހުރެ ބެންފީކާގެ ޕްވްލީޑިސްއަށް ފައުލްކުރުމާ ގުޅިގެންނެވެ.

އެއް ކުޅުންތެރިޔަކު މަދުވުމާއެކު، ބާސެލޯނާގެ ކޯޗު ހެންސީ ފްލިކް ވަނީ ޓީމަށް ބަދަލެއް ގެނެސްފައެވެ. އެގޮތުން ޑެނީ އޮލްމޯގެ ބަދަލުގައި އަރައުހޯ ކުޅެން ނެރުނެވެ.

މެޗުގެ ހަމައެކަނި ލަނޑު ބާސެލޯނާއަށް ކާމިޔާބުކޮށްދިނީ 61 ވަނަ މިނިޓުގައި ރަފީނިއާއެވެ. ބެންފީކާގެ ޑިފެންޑަރަށް ހެދުނު ގޯހެއްގެ ފައިދާ ނަގައިގެން ރަފީނިއާ ޖެހި މި ލަނޑަކީ މި ސީޒަނުގައި އޭނާ ޖެހި 25 ވަނަ އަދި މި މުބާރާތުގައި ޖެހި 9 ވަނަ ލަނޑެވެ.

މެޗުގެ 82 ވަނަ މިނިޓުގައި ބެންފީކާގެ އެންޑްރިއާ ބެލޮޓީއަށް ޝެޒްނީ ކުރި ފައުލަކާ ގުޅިގެން، ރެފްރީ ފުރަތަމަ ބެންފީކާއަށް ޕެނަލްޓީއެއް ދިނެވެ. ނަމަވެސް ވީއޭއާރު ބެލުމަށްފަހު، އޭގެ ކުރިން ބެންފީކާގެ ކުޅުންތެރިޔަކު އޮފްސައިޑްގައި ހުރިކަން ފާހަގަކުރެވި، ރެފްރީ އެ ނިންމުން ބަދަލުކުރިއެވެ.

މި މުބާރާތުގެ ލީގު ބުރުގައި މިދިޔަ ޖެނުއަރީ މަހު މި ދެ ޓީމު ލިޒްބަންގައި ބައްދަލުކުރިއިރު، މެޗު ނިމުނީ 5-4 ގެ ނަތީޖާއަކުންނެވެ. އެ މެޗުގައިވެސް ބާސެލޯނާގެ މޮޅުވުމުގެ ލަނޑު ކާމިޔާބުކޮށްދިނީ ރަފީނިއާއެވެ.