ގައުމީ މޫސުމާ ބެހޭ އިދާރާ (މެޓް) އިން ދެއްވާފައިވާ މަޢުލޫމާތުގެ އަލީގައި، ކުރިއަށް އޮތް ތިން ދުވަހު ދިވެހިރާއްޖޭގެ އެކި ސަރަޙައްދުތަކަށް ވިއްސާރަވެދާނެ ކަމަށް ލަފާކުރެވެއެވެ.

މެޓްގެ މީޑިއާ އޮފިޝަލަކު “މުޅިރާއްޖެ” އަށް ވިދާޅުވި ގޮތުގައި، ކުރިއަށް އޮތް ތިން ދުވަހު ޚާއްޞަކޮށް ދެކުނާއި މެދު ރާއްޖެތެރެއަށް ވިއްސާރަވެ، އެ ސަރަޙައްދުތަކުގެ ރަށްތަކަށް ބޯކޮށް ވާރޭވެހުމަކީ އެކަށީގެންވާ ކަމެކެވެ. އަދި އުތުރުގެ އަތޮޅުތަކަށް ކެރީގެ އަސަރު ކޮންމެވެސް ވަރަކަށް ފޯރާނެ ކަމަށްވެސް ލަފާކުރެވެއެވެ.

އިތުރު ތަފްޞީލު ދެއްވަމުން އޮފިޝަލު ވިދާޅުވީ، “ކުރިއަށް އޮތް ތިން ދުވަހު މޫސުން ގޯސްވާނީ މައިގަނޑު ގޮތެއްގައި ދެކުނާއި މެދު ރާއްޖެތެރެއަށެވެ. އެ ސަރަޙައްދުތަކަށް ބޯކޮށް ވާރޭވެހުމަކީ އެކަށީގެންވާ ކަމެކެވެ. އުތުރު ސަރަޙައްދަށް ކެރީގެ އަސަރު ފޯރާނެ ކަމަށް ލަފާކުރެވުނު ނަމަވެސް، އެ ސަރަޙައްދަށް މާބޮޑު ވިއްސާރައެއް އަންނާނެ ކަމަކަށް ނުބެލެވެއެވެ.”

ކުރިއަށް އޮތް 24 ގަޑިއިރާ ގުޅޭގޮތުން އޮފިޝަލު ވިދާޅުވީ، ދެކުނާއި މެދު ރާއްޖެތެރެއަށް އުތުރާއި އިރުއުތުރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިއްސާރައިގެ ވަގުތުތަކުގައި ވައިގެ ބާރުމިން 35 މޭލަށް އަރާފާނެ ކަމަށެވެ. އުތުރުގެ އަތޮޅުތަކަށް ގަޑިއަކު 3 މޭލާއި 13 މޭލާ ދެމެދުގެ ބާރުމިނުގައި ވައިޖެހޭނެ ކަމަށްވެސް ލަފާކުރެވެއެވެ.

ކަނޑުތައް އާންމު މިންވަރަށްވުރެ ކޮންމެވެސް ވަރަކަށް ގަދަވެ، ވިއްސާރައިގެ ވަގުތުތަކުގައި އިތުރަށް ގަދަވެދާނެ ކަމަށް އޮފިޝަލު ފާހަގަކުރެއްވިއެވެ.

އޮފިޝަލު އިތުރަށް ވިދާޅުވީ، މާރިޗު މަހުގެ 2 ވަނަ ދުވަހުން ފެށިގެން މޫސުން ރަނގަޅުވާން ފަށާނެ ކަމަށެވެ. އަދި މި ދުވަސްވަރަކީ އާންމު ގޮތެއްގައި ހޫނު ގަދަވާ މޫސުމަކަށް ވުމާއެކު، ކުރިއަށް އޮތް ރަމަޟާން މަހުގައިވެސް ހޫނުގަދަވާނެ ކަމަށް ލަފާކުރެވޭ ކަމަށް އޮފިޝަލު ފާހަގަކުރެއްވިއެވެ.