ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިލަންދެ އަތޮޅު ދެކުނުބުރީ (ދ.) އުއްދޫ، އާންމު ރައްޔިތުންނަށް ދަތުރުފަތުރުކޮށް އުޅެވޭނެ ރަށެއްގެ ގޮތުގައި ކަނޑައަޅުއްވައި، މިއަދު ރޭ ފެށިގެން ހުޅުވާލައްވާފައެވެ. މި އިޢުލާނު ކުރެއްވީ، އެ މަނިކުފާނު ދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ދ. މީދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވިގޮތުގައި، ކުރިން އަމިއްލަ ފަރާތަކުން ވިޔަފާރީގެ އުސޫލުން ބޭނުންކުރަމުން އައި ދ. އުއްދޫ، މިހާރު ވަނީ ސަރުކާރާ ހަވާލުކުރެވިފައެވެ. އަދި މި ރަށް ބެލެހެއްޓުމާއި ދަތުރުފަތުރުގެ ކަންކަން ބަލަހައްޓަވާނީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވުޒާރާއިން ކަމަށް އެ މަނިކުފާނު ހާމަކުރެއްވިއެވެ. މިކަމާ ގުޅޭ އިތުރު ތަފްސީލުތައް އެ ވުޒާރާއިން ކުރިއަށް އޮތް ދުވަސްތަކުގައި އާންމުކުރައްވާނެ ކަމަށްވެސް ވިދާޅުވިއެވެ.
މީގެއިތުރުން، ދ. މީދޫގެ ރައްޔިތުންނަށް އުފާވެރި ޚަބަރުތަކެއް ރައީސުލްޖުމްހޫރިއްޔާ ވަނީ އިއްވަވާފައެވެ. އޭގެ ތެރޭގައި:
1. ގެދޮރުވެރިކަމާއި ބޯހިޔާވަހިކަމުގެ މައްސަލައަށް މި ދައުރުގައި ޙައްލު ހޯއްދަވައިދެއްވުން.
2. 2025 ވަނަ އަހަރުގެ ނިޔަލަށް ރާއްޖެ ޓްރާންސްޕޯޓް ލިންކް (އާރް.ޓީ.އެލް) ފެރީ ނިޒާމުގެ ޚިދުމަތް ފެށުން.
3. ވެމްކޯ މެދުވެރިކޮށް ކުނި މެނޭޖުކުރުމުގެ މައްސަލައަށް ޙައްލު ހޯދުން.
4. ބަނދަރު އަޕްގްރޭޑް ކުރުމުގެ މަޝްރޫޢުގެ ދެވަނަ ފިޔަވަހި ފެށުން.
5. މަގުތައް ޒަމާނީ ފެންވަރަށް ތަރައްޤީކުރުން.
6. ކުޅިވަރުގެ ދާއިރާއިން ރަށް ތަރައްޤީކުރުން.
7. ސްކޫލުގެ ޖާގައިގެ ދަތިކަމަށް އަންނަ އަހަރު ތެރޭގައި ޙައްލު ހޯދުން.
ރައީސުލްޖުމްހޫރިއްޔާ އިތުރަށް ވިދާޅުވީ، 2025 އަދި 2026 ވަނަ އަހަރަކީ ރިޔާސީ އިންތިޚާބުގައި ވެވަޑައިގެންނެވި ހުރިހާ ވަޢުދުތަކެއް ފުރިހަމަކޮށް ނިންމަވައިދެއްވާނެ ދުވަސްތަކެއް ކަމަށެވެ. މި ހުރިހާ މަޝްރޫޢުތަކެއްވެސް ހަލުވި ދުވެއްޔެއްގައި ކުރިއަށް ގެންދަވާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
ކިޔުންތެރިންގެ ހިޔާލު