އޮސްޓްރޭލްރޭލިއާގައި ބޭއްވުނު ފެތުމުގެ މުބާރާތެއްގައި ދިވެހި ފެތުންތެރިޔާ ޢާއިޝަތު ޢުލްޔާ ޝާއިޤް ދެ ޤައުމީ ރެކޯޑެއް އައުކޮށްފިއެވެ. އެއީ އަންހެނުންގެ ލޯންގްކޯސް 50 މީޓަރ ފްރީސްޓައިލް އަދި 50 މީޓަރ ބެކްސްޓްރޯކް އިވެންޓުގެ ރެކޯޑެވެ.

އޮސްޓްރޭލިއާގެ ވެސްޓަރން އޮސްޓްރޭލިއާގައި ކުރިއަށްދިޔަ އެސް.ޑަބްލިއު.އޭ ހެންކޮކް ޕްރޮސްޕެކްޓިންގ ސްޓޭޓް ޗެމްޕިއަންޝިޕްސްގައި ޢުލްޔާ ވަނީ 50 މީޓަރ ފްރީސްޓައިލް އިވެންޓް 28.64 ސިކުންތުން ނިންމާލައިފައެވެ. މިއީ އޭނާ އަމިއްލައަށް މިދިޔަ އަހަރު 11 ވަނަ އޭޝިއަން އޭޖް ގްރޫޕް އެކުއަޓިކްސް ޗެމްޕިއަންޝިޕްސްގައި ކަނޑައެޅި 29.29 ސިކުންތުގެ ރެކޯޑަށްވުރެ ހަލުވި ދުވެއްޔެކެވެ.

ހަމަ މި މުބާރާތުގައި ޢުލްޔާ ވަނީ 50 މީޓަރ ބެކްސްޓްރޯކް އިވެންޓުގެ ރެކޯޑުވެސް އައުކޮށްފައެވެ. މި އިވެންޓް ޢުލްޔާ ނިންމާލީ 34.18 ސިކުންތުންނެވެ. މިއީ މިދިޔަ އަހަރު އިންޑިއަން އޯޝަން އައިލެންޑް ގޭމްސްގައި އައިޝަތު ސައުސަން ކަނޑައެޅި 34.32 ސިކުންތުގެ ރެކޯޑަށްވުރެ ހަލުވި ދުވެއްޔެކެވެ.

ޢުލްޔާގެ މި ކާމިޔާބީއާއެކު އޭނާ ވަނީ ދިވެހި ފެތުމުގެ ތާރީޚުގައި އަނެއްކާވެސް އާ ސަފުހާއެއް ލިޔެފައެވެ. މި ކާމިޔާބީއަކީ ކުރިއަށް އޮތް ބައިނަލްއަޤްވާމީ މުބާރާތްތަކުގައި ރާއްޖެއަށް އިތުރު ކާމިޔާބީތަކެއް ހޯދުމަށް އޮތް ފުރުޞަތެއް ކަމުގައި ފެތުމުގެ ދާއިރާގެ ފަރާތްތަކުން ދެކެއެވެ.