މާލޭ ސިޓީ ކައުންސިލުން ބާވެފައިވާ ގުރުއާނާއި ދީނީ ލިޔެކިޔުންތައް އިސްލާމީ އުސޫލުތަކާ އެއްގޮތަށް ނައްތާލުމުގެ ޚިދުމަތް ފަށައިފިއެވެ.
މާލޭ ސިޓީ ކައުންސިލުން އާންމުންގެ އަތުގައި ހުރި ބާވެފައިވާ ގުރުއާނާއި މުސްހަފުތަކާއި އެހެނިހެން ދީނީ ލިޔެކިޔުންތައް އެކަށީގެންވާ ގޮތެއްގައި ނައްތާލުމަށްޓަކައި ޚާއްޞަ ޕްރޮގްރާމެއް ފަށައިފިއެވެ. މި ޕްރޮގްރާމުގެ ދަށުން އަހަރަކު ދެ ފަހަރު މިފަދަ ތަކެތި ބަލައިގަތުމަށް ވަނީ ހަމަޖެހިފައެވެ.
މި އަހަރުގެ ފުރަތަމަ ބުރުގައި، މި މަހުގެ 28 ވަނަ ދުވަހުގެ ނިޔަލަށް ކޮންމެ ދުވަހަކު ހެނދުނު 9:00 އިން މެންދުރުފަހު 14:00 އަށް، ފަލަސްތީން ހިނގުމުގައި ހުންނަ ކައުންސިލުގެ ވޭސްޓް ސެކްޝަނުގައި މި ތަކެތި ބަލައިގަންނާނެއެވެ.
ކައުންސިލުގެ މީޑިއާ އޮފިޝަލް އާމިނަތު ޝަތުފާ ޝަފީއު ވިދާޅުވި ގޮތުގައި، މިގޮތަށް ބަލައިގަންނަ ތަކެތި ނައްތާލެވޭނީ އިސްލާމީ ޝަރީޢަތުގައި ކަނޑައެޅިފައިވާ އުސޫލުތަކާ އެއްގޮތަށް، ދޫނިދޫގައި ކައުންސިލުގެ ބެލުމުގެ ދަށުންނެވެ.
މިއީ މާލޭ ސިޓީ ކައުންސިލުން ދެވަނަ ފަހަރަށް މި ޚިދުމަތް ފޯރުކޮށްދިނުމެވެ. މިދިޔަ އަހަރުވެސް މިފަދަ ޕްރޮގްރާމެއް ކާމިޔާބުކަމާއެކު ކުރިއަށް ގެންގޮސްފައިވެއެވެ.
