އިހަވަންދޫގައި ޤާއިމްކުރުމަށް ހަމަޖެހިފައިވާ ފިޝަރީޒް ކޮމްޕްލެކްސްގެ ބިންގާ އެޅުމުގެ ރަސްމިއްޔާތު މިނިސްޓަރ ޝިޔާމްގެ އަތްޕުޅުން ކުރިއަށް ގެންދެވިއްޖެއެވެ.
މި ރަސްމިއްޔާތު ބޭއްވުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތިލަދުންމަތީ އުތުރުބުރީގެ ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން، އިހަވަންދޫގައި މިކަމަށް ޚާއްޞަކޮށް އިންތިޒާމުކުރެވުނު ޙަފްލާއެއްގައެވެ.
މި ކޮމްޕްލެކްސްގައި 1000 ޓަނުގެ ކޯލްޑް ސްޓޯރޭޖަކާއި، 50 ޓަނުގެ ބްރައިން ފްރީޒިންގ ފެސިލިޓީއެއް ޤާއިމްކުރެވޭނެއެވެ. މީގެ އިތުރުން، އިދާރީ އިމާރާތަކާއި، ކަރަންޓު އުފައްދާ މަރުކަޒެއް، އުޅަނދުފަހަރު މަރާމާތުކުރާ ވަރކްޝޮޕަކާއި މުދާ ރައްކާކުރާ ގުދަނެއްވެސް މި ކޮމްޕްލެކްސްގައި ހިމެނޭނެއެވެ. އަދި 130 މީޓަރުގެ ދިގު މަގަތު ފާލަމަކާއި، 3.5 މީޓަރުގެ ފުންމިނުގައި ބަނދަރެއް އަދި ތިން ތަނަކުން މަސްކިރޭ ޖެޓީއެއްވެސް މި މަޝްރޫޢުގެ ދަށުން ތަރައްޤީ ކުރެވޭނެއެވެ.
މި މަޝްރޫޢަކީ ދިވެހި ސަރުކާރާއި އިސްލާމިކް ޑިވެލޮޕްމަންޓް ބޭންކާ ގުޅިގެން ކުރިއަށްގެންދާ މަޝްރޫޢެކެވެ. މި މަޝްރޫޢުގެ ސަބަބުން ބޮޑުތިލަދުންމަތީގެ މަސްވެރިންނަށް ތެޔޮ އަދި އައިސް ހޯދުމަށް ދުރަށް ދަތުރުކުރަންޖެހޭ ދަތުރުތައް ނިމުމަކަށް އައިސް، ޚަރަދުތައްވެސް ކުޑަވެގެންދާނެކަމަށް ލަފާކުރެވެއެވެ.
މި މަޝްރޫޢުގެ ސަބަބުން އިހަވަންދޫގައި 150 އަށްވުރެ ގިނަ ވަޒީފާގެ ފުރުޞަތު އުފެދިގެންދާނެކަމަށް އަންދާޒާކުރެވެއެވެ. މިއީ އުތުރުގެ މަސްވެރިކަމުގެ ޞިނާޢަތަށް އިންޤިލާބީ ހެޔޮ ބަދަލުތަކެއް ގެނެސްދޭނެ މުހިންމު މަޝްރޫޢެއްގެ ގޮތުގައި ފާހަގަކުރެވެއެވެ.
