މޫސުމާބެހޭ ޤައުމީ މަރުކަޒުން (މެޓް) އައްޑޫ ސިޓީއަށް ރީނދޫ ސަމާލުކަމުގެ އިންޒާރެއް ނެރެފިއެވެ. މިއީ އެ ސަރަޙައްދަށް ބޯކޮށް ވާރޭވެހި، ގުގުރުމުގެ ފުރުޞަތު އޮތްކަމަށް ބެލެވޭތީއެވެ.
މި އިންޒާރުގެ މުއްދަތު ހަމަވާނީ މިރޭ 22:00 ގައެވެ. މީގެ ކުރިން މެޓުން ވަނީ އެ ސަރަޙައްދަށް ހުދު ސަމާލުކަމުގެ އިންޒާރެއް ނެރެފައެވެ.
މިރޭގެ މޫސުމާ ގުޅޭގޮތުން މެޓުން މަޢުލޫމާތު ދެއްވާފައިވަނީ، ރާއްޖޭގެ ގިނަ ސަރަޙައްދުތަކަކަށް ވިއްސާރަވެ، ބައރަވެ، ބައެއް ރަށްރަށަށް ގުގުރުމާއެކު ބޯކޮށް ވާރޭވެހުމުގެ ފުރުޞަތު އޮތް ކަމަށެވެ.
މޫސުމާބެހޭ އިތުރު މަޢުލޫމާތުގެ ތެރޭގައި:
– މެދުރާއްޖެތެރޭގެ އަތޮޅުތަކަށް އިރު އުތުރާއި އިރުން، އަދި ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހުމުގެ ފުރުޞަތު އޮތްކަމަށް ލަފާކުރެވެއެވެ.
– ވިއްސާރަ ވިލާގަނޑުގައި ގަޑިއަކު 40 މޭލުގެ ބާރުމިނަށް ވައިގަދަވުމަކީ އެކަށީގެންވާ ކަމެކެވެ.
– ކަނޑުތައް އާންމު މިންވަރަކަށް ގަދަވެ، ވިއްސާރަ ވިލާގަނޑުގައި އިތުރަށް ގަދަވުމުގެ ފުރުޞަތު އެބައޮތެވެ.
މޫސުމަށް ޚާއްޞަ ސަމާލުކަމެއް ދިނުމަށް މެޓުން ވަނީ އާންމުންނަށް އިލްތިމާސްކުރައްވާފައެވެ.
