އިމާރާތެއްގެ ފަސްވަނަ ފަންގިފިލާގެ ކުޑަދޮރަކުން ކުޑަކުއްޖަކު ނުކުތުމަށް މަސައްކަތްކުރާ މަންޒަރު ދައްކުވައިދޭ ވީޑިއޯއެއް އިޖުތިމާޢީ މީޑިއާގައި ފެތުރެމުންދާތީ، މި ވީޑިއޯ ދައުރުކުރުން ހުއްޓާލައި، އުނިކޮށްލުމަށް ދިވެހި ފުލުހުންގެ ޚިދުމަތުން ޢާންމުންނަށް އިލްތިމާސްކޮށްފިއެވެ.
ފުލުހުންގެ ޚިދުމަތުން މިރޭ ހާމަކުރެއްވި ގޮތުގައި މި ވީޑިއޯ ފުލުހުންގެ ސަމާލުކަމަށް އައިސްފައިވާ ކަމަށާއި، މި ހާދިސާއާ ގުޅިގެން އަޅަންޖެހޭ ފިޔަވަޅުތައް އަޅަމުންދާ ކަމަށެވެ.
“މިފަދަ ވީޑިއޯތައް ދައުރުކުރުމަކީ އެ ކުއްޖާއާއި ކުއްޖާގެ ޢާއިލާ، ޢާންމުންގެ ފާޑުކިޔުމާއި ނަފްސާނީ ގޮތުން އަނިޔާއަށް ހުށަހެޅިގެންދާނެ ކަމެކެވެ. ޢާއިލާގެ އިތުރުން، މިކަމުގެ ސަބަބުން މި ވީޑިއޯ ފެންނަ ކޮންމެ ފަރުދަކަށްވެސް ނަފްސާނީގޮތުން އަސަރުކުރުމަކީ އެކަށީގެންވާ ކަމެކެވެ،” ފުލުހުން ވިދާޅުވިއެވެ.
ފުލުހުން އިތުރަށް ފާހަގަކުރެއްވި ގޮތުގައި މިފަދަ މަންޒަރުތަކުގެ ސަބަބުން، ކުޑަކުދިން ނުވަތަ ނާޒުކު ހާލަތުގައި ތިބޭ ފަރާތްތައް ޓްރިގަރވެ، އެފަރާތްތައް ނުރައްކަލަކަށް ހުށަހެޅިދާނެ ކަމަށެވެ. އަދި މިފަދަ ފުޓޭޖްތައް ދައުރުކުރުމަކީ، އިޖުތިމާޢީ މީޑިއާގައި ސަމާލުކަން ހޯދުމަށް މަސައްކަތްކުރާ ސަގާފަތެއް އާލާވެ، ސަލާމަތާއި ރައްކާތެރިކަމާ ގުޅޭ މުހިންމު ކަންކަމަށް ދެވޭ ސަމާލުކަން ކުޑަވެގެން ހިނގައިދާނެ ކަމެއް ކަމަށްވެސް ފުލުހުން ވަނީ ފާހަގަކުރައްވާފައެވެ.
ފުލުހުން ވަނީ ރައްކާތެރިކަމުގެ ފިޔަވަޅުތަކަށް އަހައްމިއްޔަތުކަން ދީ، ކުޑަދޮރުތަކާއި ބެލްކަނިތައް ރައްކާތެރިކުރުމާއި، ކުޑަކުދިންނަށް ނުރައްކާތަކާ ބެހޭގޮތުން ހޭލުންތެރިކުރުވުމަށް ގޮވާލައްވާފައެވެ. އަދި މިފަދަ ވީޑިއޯތައް އިތުރަށް ދައުރުކުރުމުގެ ބަދަލުގައި އެ ޕްލެޓްފޯމްތަކުން ނެގުމަށް ރިޕޯޓުކުރުމަށްވެސް ޢާންމުންނަށް އިލްތިމާސްކުރައްވާފައިވެއެވެ.
ކިޔުންތެރިންގެ ހިޔާލު