ޔަމަނުގެ ހޫތީ މިލިޝިއާ “ޓެރަރިސްޓް ޖަމާޢަތެއް” ގެ ގޮތުގައި ޓްރަމްޕް ކަނޑައެޅުމާމެދު އީރާނުން ކުށްވެރިކޮށް، އެއީ “އަސާސެއް ނެތް” ކަމެއް ކަމުގައި ބުނެފައިވެއެވެ.
ބަޔާނެއްގައި، ޚާރިޖީ ވުޒާރާގެ ތަރުޖަމާނު އިސްމާޢީލް ބަޤާއީ ވިދާޅުވެފައިވަނީ ހޫތީން ބްލެކްލިސްޓް ކުރުމަކީ “ޔަމަނުގެ ރައްޔިތުންނާ ދެކޮޅަށް އިންސާނިއްޔަތާ ޚިލާފު ފިޔަވަޅުތައް އެޅުމަށް ހުއްޖަތެއް” ކަމަށެވެ. އަދި އެއީ “ޖަވާބުދާރީވާން ނުޖެހޭ އަދި އަސާސެއް ނެތް” ކަމެއް ކަމުގައި ސިފަކުރެއްވިއެވެ.
ބުދަ ދުވަހު، ހޫތީ ބަޣާވާތްތެރިން އަލުން “ބޭރުގެ ޓެރަރިސްޓް ޖަމާޢަތެއް” ގެ ގޮތުގައި ކަނޑައެޅުމަށް ޓްރަމްޕް ވަނީ އެގްޒެކެޓިވް އަމުރެއްގައި ސޮއިކުރައްވާފައެވެ. ޓްރަމްޕްގެ ފުރަތަމަ ދައުރުގައި މި ގްރޫޕް ބްލެކްލިސްޓް ކުރެވުނު ނަމަވެސް، އޭނާގެ ފަހަތުން ރައީސްކަމަށް އައި ޖޯ ބައިޑެން މަޤާމާ ހަވާލުވުމަށްފަހު 2021 ގައި އެ ލިސްޓުން އުނިކުރެވުނެވެ.
ޣައްޒާގެ ފަލަސްޠީނުންނަށް ތާއީދުކުރުމުގެ ގޮތުން، ހޫތީން ވަނީ ރަތު ކަނޑުގައި އިސްރާއީލާ ގުޅުންހުރި ކަމަށް ބުނާ އުޅަނދުފަހަރަށް އަމާޒުކޮށް ގިނަ އަދަދެއްގެ ހަމަލާތައް ދީފައެވެ.
