މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ޤަދަރާއި އިޙުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯއެއް ސޯޝަލް މީޑިއާގައި ފެތުރުމާ ގުޅިގެން، މިނިސްޓްރީ އޮފް އިސްލާމިކް އެފެއާޒުން ވަނީ މައްސަލަ ތަޙުޤީޤުކުރަން ފަށާފައެވެ.

މި މައްސަލައާ ގުޅޭގޮތުން މިނިސްޓަރ އޮފް އިސްލާމިކް އެފެއާޒް، ޑރ. މުހައްމުދު ޝަހީމު އަލީސައީދު ވަނީ އެކްސް މެދުވެރިކޮށް މެސެޖްއެއް ނެރުއްވާފައެވެ. މިނިސްޓަރ ވިދާޅުވީ މި މައްސަލަ މިނިސްޓްރީގެ ސަމާލުކަމަށް އައިސްފައިވާ ކަމަށާއި، މިއީ ކިހިނެއް ހިނގާފައިވާ ކަމެއްތޯ ބެލުމުގެ މަސައްކަތް މިހާރު ފަށާފައިވާ ކަމަށެވެ.

މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ޤަދަރާއި އިޙުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯގެ މައްސަލަވަނީ ސަމާލުކަމަށް އައިސްފަ. މިއީ ކިހިނެއް ހިގާފައިވާ ކަމެއްތޯ ބެލުމުގެ ކަންކަން މިނިސްޓްރީ އިން ވަނީ ފަށާފަ.

— Mohamed Shaheem Ali Saeed (@Mohamedshaheem1) January 17, 2025

މީގެ އިތުރުން މިނިސްޓަރ ވިދާޅުވީ:-

މި މައްސަލައިގައި ހިމެނޭ ވީޑިއޯ ދައްކާ ގޮތުން، މިސްކިތެއް ކަމަށް ބެލެވޭ ތަނެއްގައި ބަޔަކު މިސްކިތެއްގެ ޤަދަރާއި އިޙުތިރާމާ ޚިލާފު ޢަމަލުތަކެއް ހިންގާފައިވާ ކަމަށް ބެލެވެއެވެ. ނަމަވެސް، މި ވީޑިއޯ ރެކޯޑުކުރެވުނު ތަނާއި ތާރީޚު އަދި ހިމެނޭ ފަރާތްތަކާ ބެހޭ އިތުރު މަޢުލޫމާތު މި ވަގުތު ލިބިފައެއް ނުވެއެވެ.މިސްކިތްތަކަކީ އިސްލާމްދީނުގައި ޚާއްޞަ ޤަދަރަކާއި އިޙުތިރާމެއް ދެވިފައިވާ ތަންތަން ކަމަށްވުމާއެކު، މިފަދަ ތަންތަނުގައި ނުއެކަށީގެންވާ ޢަމަލުތައް ހިންގުމަކީ ޤާނޫނީ ގޮތުން ވެސް މަނާކަމެކެވެ. މިފަދަ ޢަމަލުތަކަކީ މުޖުތަމަޢުގެ އަމަންއަމާންކަމަށް ނޭދެވޭ އަސަރުކޮށްފާނެ ކަންކަން ކަމަށްވާތީ، މިނިސްޓްރީ އޮފް އިސްލާމިކް އެފެއާޒުން މި މައްސަލަ ސީރިއަސްކޮށް ބަލަމުންދާކަން ފާހަގަކުރެވެއެވެ.