އަވައްޓަރި ސްރީ ލަންކާގެ ރައީސް އަނުރަ ކުމާރަ ދިސާނަޔަކަ، ޗައިނާއަށް ކުރައްވަމުންގެންދަވާ ރަސްމީ ދަތުރުފުޅުގައި، ޗައިނާގެ ރައީސް ޝީ ޖިންޕިންއާ ބައްދަލުކުރައްވައި، އިންވެސްޓްމަންޓާއި އިޤްތިޞާދީ ދާއިރާގައި ދެ ޤައުމުގެ މެދުގައި އިތުރު އެއްބާރުލުން ހޯއްދެވުމަށް އެއްބަސްވެވަޑައިގެންފިއެވެ.

މި ބައްދަލުވުމުގައި، ޗައިނާގެ “ބެލްޓް އެންޑް ރޯޑް” އިނީޝިއޭޓިވްގެ ދަށުން އިޤްތިޞާދީ އަދި ޓެކްނޮލޮޖީގެ ދާއިރާ ކުރިއެރުވުމާ ގުޅޭ 15 އެއްބަސްވުމެއްގައި ސޮއިކުރެވުނެވެ. އެހެންނަމަވެސް، މި އެއްބަސްވުންތަކުގެ ތަފްޞީލު ރަސްމީކޮށް ހާމަކުރެވިފައެއް ނުވެއެވެ.

ސްރީ ލަންކާގެ މީޑިއާ ރިޕޯޓުތަކުގައި ފާހަގަކޮށްފައިވާ ގޮތުގައި، ދިސާނަޔަކަގެ މި ދަތުރުފުޅުގައި، ޗައިނާއިން ހަމްބަންޓޯޓާގައި ތެލުގެ ރިފައިނަރީއެއް ތަރައްޤީކުރުމުގެ 3.7 ބިލިއަން ޑޮލަރުގެ މަޝްރޫޢުއެއްގައި ސޮއިކުރެވިފައިވެއެވެ. މި އެއްބަސްވުމުގެ ދަށުން، ސްރީ ލަންކާގެ ހަކަތައާބެހޭ ވުޒާރާއާއި ޗައިނާގެ ސިނޮޕެކް ކޯޕަރޭޝަނާ ދެމެދު ވެވުނު އެއްބަސްވުމުގައި، ދުވާލަކު 200,000 ބެރެލް ތެޔޮ އުފެއްދުމުގެ ޤާބިލުކަން ހުރި ރިފައިނަރީއެއް ޤާއިމްކޮށް، އޭގެ ބޮޑުބައެއް އެކްސްޕޯޓްކުރުމަށް ރޭވިފައިވާ ކަމަށް ބަޔާންކޮށްފައިވެއެވެ.

މިދިޔަ އަހަރުގެ ސެޕްޓެންބަރު މަހު ބޭއްވުނު ރިޔާސީ އިންތިޚާބު ކާމިޔާބުކުރެއްވި ދިސާނަޔަކަ ޗައިނާއަށް ވަޑައިގަތީ، އިންޑިޔާއަށް ކުރެއްވި ރަސްމީ ދަތުރުފުޅަކަށްފަހުގައެވެ. ސްރީ ލަންކާގެ ކުރީގެ ރައީސް މަހިންދަ ރާޖަޕަކްސަގެ ވެރިކަމުގައި، ބޮޑެތި މަޝްރޫޢުތައް ހިންގުމަށް ޗައިނާއިން ގިނަ އަދަދެއްގެ ދަރަނި ނަގާފައިވެއެވެ.

ކޯވިޑް-19 ގެ ބަލިމަޑުކަމަށްފަހު، 2022 ވަނަ އަހަރުގެ މެއި މަހުގައި ސްރީ ލަންކާގެ މާލީ ޙާލަތު ދަށްވެ، ބޭރުގެ ލޯނުތައް އަދާނުކުރެވޭ ހިސާބަށް ދިޔައެވެ. މިއީ ދަރަނި އިތުރުވެ، ދައުލަތުގެ ރިޒާވްގައި ހުރި ބޭރު ފައިސާގެ ޢަދަދު ދަށްވުމުގެ ސަބަބުންނެވެ. ނަމަވެސް، ދިސާނަޔަކަ ވެރިކަމާ ހަވާލުވެވަޑައިގަތުމަށްފަހު، ސްރީ ލަންކާއިން ދައްކަންޖެހޭ 12.55 ބިލިއަން އެމެރިކާ ޑޮލަރުގެ ދަރަނި އަދާކުރުމުގެ ރޭވުންތައް އަލުން އެކުލަވާލެވިފައިވެއެވެ. މީގެ ތެރޭގައި ޗައިނާ، ޖަޕާން އަދި އިންޑިޔާ ހިމެނެއެވެ.

ސްރީ ލަންކާގެ އިޤްތިޞާދު އަލުން އާރާސްތުކުރުމަށްޓަކައި، އިންޓަރނޭޝަނަލް މަނިޓަރީ ފަންޑް (އައިއެމްއެފް) އިން ހުށަހަޅާފައިވާ 2.9 ބިލިއަން ޑޮލަރުގެ މާލީ ޕެކޭޖު ހޯދުމަށް، ދަރަނި އަދާކުރުން ފަސްކުރުމަށް ޗައިނާގެ އެގްޒިމް ބޭންކާއި ޗައިނާ ޑިވެލޮޕްމަންޓް ބޭންކާއެކު ސީދާ އެއްބަސްވުންތަކެއް އެކުލަވާލަން ޖެހިފައިވެއެވެ.