މުހިންމު އިސްލާހުތަކާއެކު ތުޅާދޫ ހައުސިން ޔުނިޓްތަކަށް ކުރިމަތިލާން 11 ޖެނުއަރީގައި ހުޅުވާލަން ހައުސިން މިނިސްޓްރީން ނިންމައިފިއެވެ.

ތުޅާދޫގައި ސަރުކާރުން އިމާރާތްކޮށްފައިވާ 100 ހައުސިން ޔުނިޓް ދޫކުރުމުގެ ކަންކަން އެ ރަށު ކައުންސިލުން ގެންދާގޮތާ މެދު ރައްޔިތުންގެ އެތަކެއް ކަންބޮޑުވުންތަކެއް އެބައޮތެވެ. ނަމަވެސް ރައްޔިތުންގެ ކަންބޮޑުވުންތައް ހައްލުކުރާކަށް ކައުންސިލުން ބޭނުމެއް ނުވެއެވެ.

އެހެންވެ ހައުސިން މިނިސްޓްރީން ވަނީ ތުޅާދޫ ހައުސިން ޔުނިޓަށް އެދި ހުށަހަޅާފައިވާ ފޯމްތައް ބާތިލްކޮށް، އެ މަސައްކަތް އެ މިނިސްޓްރީން ކުރިއަށްގެންދާގޮތަށް ހަމަޖައްސާފައެވެ.

ހައުސިން މިނިސްޓްރީން މިއަދު ނެރުނު ނޫސް ބަޔާނެއްގައި ވަނީ ތުޅާދޫ ރައްޔިތުންގެ ހިތްހަމަނުޖެހުން ބޮޑުވެ، ތުޅާދޫ މެޖިސްޓްރޭޓް ކޯޓުން ވަނީ ހައުސިން ޔުނިޓްތައް ދޫކުރުމުގެ މަސައްކަތް މުރާޖައާކުރަން އަންގާފައި ކަމަށެވެ. ނަމަވެސް ތުޅާދޫ ކައުންސިލުން އެކަށީގެންވާ އެހީތެރިކަމާއި އެއްބާރުލުން ލިބިފައި ނުވުމުން، މި މަސައްކަތް ވީހާވެސް އިންސާފުވެރި އަދި ހާމަކަންބޮޑު ގޮތެއްގައި ކުރިއަށް ގެންދިއުމަށްޓަކައި، އެ މިނިސްޓްރީން ވަނީ މުހިންމު ނިންމުންތަކެއް ނިންމާފައި ކަމަށެވެ.

އެގޮތުން، ތުޅާދޫގައި އިމާރާތްކޮށްފައިވާ 100 ހައުސިން ޔުނިޓް ދޫކުރުމުގެ އުސޫލު މިހާރު ވަނީ ސަރުކާރުގެ ގެޒެޓްގައި ޝާއިއުކޮށްފައެވެ.

މި އުޞޫލުގައި ހައުސިންގ ޔުނިޓްތަކަށް ކުރިމަތިލާ ފަރާތްތަކުގެ ޝަރުޠުތަކާއި، ޕޮއިންޓުދެވޭނެ ގޮތުގެ ތަފްޞީލު ހިމަނާފައިވާނެއެވެ.

މި ގޮތުން އުޞޫލަށް ގެނެވުނު މައިގަނޑު ބަދަލުތަކަކީ މަސްދުވަހަކަށް ޖެހޭ ޖުމުލަ އާމްދަނީ 60,000 ރުފިޔާއަށް ވުރެ އިތުރަށް ލިބޭ ފަރާތެއް ކަމުގައި ނުވުމާއި ޚާއްސަ އެހީއަށް ނުވަތަ އިޖުތިމާޢީ ރައްކާތެރިކަން ބޭނުންވާ އެއް ފަރާތަށްވުރެ ގިނަ ފަރާތް ބަލަހައްޓަމުން އަންނަ ފަރާތްތަކަށް ޚާއްސަ ކުރެވިފައިވާ ޕޮއިންޓު ހިމެނުން ހިމެނެ އެވެ.

މީގެއިތުރުން ތުޅާދޫ ރަށްވެހިންނާއި ތުޅާދުއަށް ހިޖުރަކޮށްގެން، އެ ރަށުގައި މެދުނުކެނޑި ދިރިއުޅެމުންދާތާ 10 އަހަރު ވެފައިވާ ފަރާތްތަކަށް ޚާއްސަކުރެވިފައިވާ ޕޮއިންޓު ދިނުމަށް ނިންމާފައިވެ އެވެ. އަދި މައިންބަފައިން ބަލަހައްޓަމުންދާ ފަރާތްތަކަށް ޚާއްސަކޮށް ޕޮއިންޓް ދެވޭނެ ގޮތް ވަނީ ހަދާފަ އެވެ.

ސަރުކާރުގެ ބޯހިޔާވަހިކަމުގެ ސިޔާސަތު ބައްޓަން ކުރެވިފައިވަނީ ކޮންމެ ދިވެހިރައްޔިތަކަށް ބޯހިޔާވަހިކަމުގެ ފުރުޞަތު ތަނަވަސްކޮށްދިނުމާއެކު ކޮންމެ މީހަކަށްވެސް އިޖްތިމާޢީ ރައްކާތެރިކަން ފޯރުކޮށްދިނުމަށެވެ.

ހައުސިން މިނިސްޓްރީން ބުނީ ތުޅާދޫގައި ޢިމާރާތްކޮށްފައިވާ 100 ހައުސިންގ ޔުނިޓަށް އެދި ހިޔާވެހި ޕޯޓަލް މެދުވެރިކޮށް ފޯމު ހުށަހެޅުމުގެ ފުރުޞަތު 11 ޖަނަވަރީ ވާ އާދީއްތަ ދުވަހުން ފެށިގެން ހުޅުވާލުމަށްވަނީ ހަމަޖެހިފައި ކަމަށެވެ. އެ މުއްދަތު ހަމަވާނީ 11 އޭޕްރީލްގަ އެވެ.

މިކަމާ ގުޅޭ އިތުރު މަޢުލޫމާތު ސާފުކުރެއްވުމަށް ހިޔާވެހި ޕޯޓަލް މެދުވެރިކޮށް ސުވާލު ހުށަހަޅައިގެން ނުވަތަ މިނިސްޓްރީގެ 4004919 ނަންބަރަށް ގުޅުމުން ލިބޭނެއެވެ.