ޣައްޒާގައި އިމާރާތެއް ވެއްޓި 17 މީހުން މަރުވެއްޖެއެވެ.

މަރުވި މީހުންގެ ތެރޭގައި 4 ކުޑަކުދިންވެސް ހިމެނެއެވެ.

ރިޕޯޓްތައްބުނާގޮތުގައި ވެއްޓުނު އިމާރާތަކީ، އިސްތިއުމާރީ ސިފައިން ބޮންއެޅުމުގެ ސަބަބުން ހަލާކުވެފައި ހުރި އިމާރާތެކެވެ.

އަދި އިމާރާތް ވެއްޓުނީ، ޣައްޒާއަށް މިހާރު ކުރަމުންދާ ގަދަ ވިއްސާރައާއި، ޣައްޒާ ތަހައްމަލް ކުރަމުންދާ ގަދަފިނީގެ ސަބަބުން ކަމަށް، ޣައްޒާ ސިވިލް ޑިފެންސުން ބުނެފައި ވެއެވެ.

އެ އިމާރާތް ވެއްޓުނުއިރު، އެ ތަނުގައި އެތައް ބަޔަކު ދިރިއުޅެމުން ގެންދިޔައެވެ. އިމާރާތް ވެއްޓުމާއެކު، ކޮންކްރޯޓްތައް ދަށުން މަރުވެފައިވާ އާންމުންގެ ހަށިތައް ނަގާފައިވަނީ ސިވިލް ޑިފެންސް ޓީމުތަކުންނެވެ.

ޣައްޒާއަށް ތޫފާނާއެކު ގަދަ ވަޔާއި، ބޯކޮށް ވާރޭވެހި މުޅި ޣައްޒާގައި އޮތީ ފެންބޮޑުވެފައެވެ.

ވިއްސާރައިގެ ސަބަބުން، ބަލިކަށިކޮށްހުރި އެތައް އިމާރާތެއް މިހާތަނަށްވެސް ވެއްޓިފައި ވެއެވެ.

ގަދަވައި ޖެހި، ފެންބޮޑުވެ އެތައް އިމާރާތެއް ވެއްޓިދާނެ ކަމުގެ ބިރު އުފެދިފައި ވެއެވެ.

އެހެން ނަމަވެސް، އާންމުންނަށް އެފަދަ އިމާރާތްތަކުގައި ދިރިއުޅުން ނޫން ގޮތެއް ނެތެވެ.

އިސްތިއުމާރީ އިސްރާއީލުން ގެންދަނީ، ޣައްޒާއަށް މޮބައިލް ގެތަކާއި، ޓެންޓު އެތެރެކުރަން ހުރަސް އަޅަމުންނެވެ.

އެކަށީގެންވާ ހިޔާވަހިކަމެއް ނެތުމުގެ ސަބަބުން ގަދަ ފިނީގެ ސަބަބުން މިހާރުވެސް ވިއްސަށްވުރެ ގިނަމީހުން މަރުވަފައި ވެއެވެ. އޭގެ ތެރޭގައި ތުއްތު ކުދިންވެސް ހިމެނެއެވެ.

ގަދަވައިގެ ސަބަބުން ޓެންޓުތައި ވީދި، އަދި ބައެއް ޓެންޓުތައް ގަދަ ވަޔާއެކު އުދުހިގެން ގޮސް އެތައް ބަޔަކަށް ބޮޑެތި އަނިޔާތަކެއް ވެސް ލިބިފައި ވެއެވެ.