ފަލަސްތީނު – އިސްރާއީލު މައްސަލަ ދާއިމީގޮތެއްގައި ހައްލުކުރުމަށް ހުށަހެޅިފައިވާ “ދެދައުލަތުގެ ހައްލު” ގަރާރު އދގެ އާންމު މަޖިލީހުން ފާސްކޮށްފިއެވެ.

“ނިއުޔޯކް ޑިކްލަރޭޝަން” ގެ ނަމުން ނަންދީފައިވާ މި ގަރާރު ފާސްކުރުމަށް ވޯޓަށް އެހުމުން، ގަރާރު ފާސްކުރުމަށް އދގެ 142 މެމްބަރު ގައުމުން ވޯޓު ދީފައި ވެއެވެ.

ގަރާރު ފާސްކުރުމާ ދެކޮޅަށް ވޯޓު ދީފައިވަނީ 10 ގައުމަކުންނެވެ. އަދި ވޯޓުގައި ބައިވެރި ނުވަނީ 12 ގައުމުންނެވެ.

ގަރާރު  ފާސްކުރުމާ ދެކޮޅަށް ވޯޓުދިނީ، އެމެރިކާއާއި، އިސްރާއީލުގެ އިތުރުން، އާޖެންޓީނާ، ހަންގޭރީ، މައިކްރޮނޭޝިޔާ، ނައޫރޫ، ޕަލާއު، ޕަޕުއާ ނިއުގިނީ، ޕެރެގުއޭ، އަދި ޓޮންގާއިންނެވެ.

ގަރާރު ފާސްކުރުމަށް 142 ގައުމުން ވޯޓުދިނުމާއެކު، އާންމު މަޖިލީހުގެ ޖަލްސާ ހިނގަމުންދިޔަ މާލަމުގައި އަތްތިލަބަޑީގެ އަޑުފަށްގަނޑު ގުގުމައިގެންދިޔައެވެ.

“ދެދައުލަތުގެ ހައްލު” ގަރާރަކީ، އެކަން ތަންފީޒުކުރުމުގެ މަގަށް މަސައްކަތް ކުރުމަށް ހަރަކާތްތެރި، ވަގުތު ކަނޑައެޅިފައިވާ، ފިޔަވަޅުތަކެއް އެޅުމަށް ގޮވާލާ ގަރާރެކެވެ.

މި ގަރާރަކީ ސައުދީ އަރަބިއްޔާއާއި، ފްރާންސް އިސްނަގައިގެން ޖުލައިމަހު ބޭއްވި އދގެ ކޮންފަރެންސުން އެކަށައެޅި ގަރާރެކެވެ. ޖުލައިމަހު ބޭއްވި ކޮންފަރެންސް އެމެރިކާއާއި އިސްރާއީލުން ބޮއިކޮޓްކުރިއެވެ.

އދގެ ކޮންފަރެންސްއިން އެކަށައެޅި ގަރާރު، އދގެ އާންމު މަޖިލީހުން ފާސްކުރުމުން ފަލަސްތީނު ސަރުކާރުންވަނީ އެކަމަށް މަރްހަބާ ކިޔާފައެވެ.

ފަލަސްތީނު ސަރުކާރުގެ ޚާރިޖިއްޔާއިންވަނީ، މި ގަރާރު، ޢަމަލުކުރެވޭނެ ޕްލޭނަކަށް ހެދުމަށް ސައުދީ އަރަބިއްޔާއާއި، ފްރާންސުން ކުރި މަސައްކަތަށް ޝުކުރު އަދާކޮށްފައެވެ.

ހަމަ އެއާއެކު، އިސްރާއީލުގެ އިސްތިއުމާރީ ހިސާރު ނިމުމަކަށް ގެނައުމަށް ހުރިހާ މެކޭނިޒަމްތަކެއް އެކްޓިވޭޓް ކުރުމަށާއި، ފަލަސްތީނު ރައްޔިތުންގެ ޝަރުއީ ހައްގުތައް ހާސިލްކުރުމަށް މަސައްކަތް ފެށުމަށްވެސް ފަލަސްތީނު ޚާރިޖިއްޔާއިން ގޮވާލާފައި ވެއެވެ.