ޔަމަނުގައި ވެރިކަންކުރާ ހޫޘީން، އިސްތިއުމާރީ އިސްރާއީލަށް ޑްރޯން ހަމަލާތަކެއް ދީފިއެވެ.

ރިޕޯޓްތައް ބުނާގޮތުގައި ހޫޘީން އިސްރާއީލަށް 3 ޑްރޯން ފޮނުވާލިއެވެ.

ޔަމަނުން ޑްރޯންތައް އުދުއްސާލި ޚަބަރަށްފަހު އިސްރާއީލުގެ އެކި ސަރަހައްދުތަކުގައި ނުރައްކަލުގެ އިންޒާރު ޖަހާފައި ވެއެވެ.

އަދި އިސްތިއުމާރީ އަސްކަރިއްޔާއިން ފަހުން ބުނެފައިވަނީ، އެ ޑްރޯންތައް އިސްރާއީލުގެ ވައިގެ ސަރަހައްދުގެ ތެރެއަށް ވަން ނަމަވެސް، އެއަރ ޑިފެންސުން ހަމަލާދީ  ވައްޓާލި ކަމަށެވެ.

ނަމަވެސް، ސޯޝަލް މީޑިއާގައި އާންމުވަމުންދާ ވީޑިއޯ އަދި ފޮޓޯތަކުން ހާމަވެފައިވަނީ، ހޫޘީންގެ ޑްރޯން ހަމަލާތައް އިސްރާއީލުގެ ރަށްތަކަށް އަމާޒުވި ކަމަށެވެ.

އެގޮތުން، އިސްތިއުމާރީ ސިފައިންގެ ބޭސްތަކަށާއި، އެއަރޕޯޓްތަކަށްވެސް ޑްރޯން ހަމަލާތައް އަމާޒު، ތަންތަން ގޮވައި ދުން އަރަމުންދާ މަންޒަރު ވީޑިއޯތަކުން ފެނެއެވެ.

މިއަދުގެ ހަމަލާތައް އަމާޒުވި އެއް އެއަރޕޯޓަކީ އިސްރާއީލުގެ ދެކުނުގެ އީލާތުގައި އޮންނަ ރާމޮން އެއަރޕޯޓެވެ.

އެއަރޕޯޓަށް ދިން ހަމަލާގައި އެތައް ބަޔަކު ޒަޚަމްވިކަމަށް އިސްރާއީލު މީޑިއާއިން ބުނެއެވެ.

މި އެއަރޕޯޓަށް ހޫޘީން އިއްޔެވެސް ވަރުގަދަ މިސައިލް ހަމަލާއެއް ދިނެވެ. އެ ހަމަލާއާއެކު އެއަރޕޯޓުގެ ޓާމިނަލްގެ ބައެއް ގޮވައި، އެއަރޕޯޓު ބަންދުކުރަން ޖެހުނެވެ.

އަދި މަތިންދާ ބޯޓުތައް ގްރައުންޑްކޮށް، ބޭރުން އަންނަ ބޯޓުތައްވެސް ހުއްޓުވިއެވެ.

އިސްތިއުމާރީ އަސްކަރިއްޔާއިން ބުނެފައިވަނީ، އެއަރޕޯޓަށް އިއްޔެ ހަމަލާދިން ޑްރޯން އިސްރާއީލުގެ ވައިގެ ދިފާއު ފޫއަޅުވާލައި ވަދެ ހަމަލާދެވުނީ ސިފައިންނަށް ހެދުނު މިސްޓޭކަކުން ކަމަށެވެ.

ހޫޘީން ހަމަލާދިނީ ކަމިކާޒޭ ޑްރޯން ބޭނުންކޮށްގެންނެވެ. މިއީ، ހަމަލާދޭ ތަނަކަށް ޑްރޯން ވައްޓައި ގޮއްވާލައިގެން ހަމަލާދޭ ބާވަތުގެ ޑްރޯންއެވެ.