ހދ. ނޮޅިވަރަންފަރުގައި ތަރައްޤީކޮށްފައިވާ 100 ހައުސިން ޔުނިޓު، އެރަށު ކައުންސިލާ ރަސްމީކޮށް ރޭ ހަވާލުކޮށްފިއެވެ.
މި ހައުސިން ޔުނިޓްތައް ހަވާލުކޮށްފައި ވަނީ ރައީސް ޑރ. މުޙައްމަދު މުޢިއްޒު، ހދ. އަތޮޅުގެ މީހުން ދިރިއުޅޭ 13 ރަށަށް ހޯމަ ދުވަހު ފެއްޓެވި ދަތުރުފުޅުގެ ތެރެއިން ރޭ ނޮޅިވަރަންފަރަށް ކުރެއްވި ޒިޔާރަތުގައި އެރަށުގެ ރައްޔިތުންނާއެކު ބޭއްވެވި ޖަލްސާގައެވެ. މި ހައުސިން ޔުނިޓްތައް ރަސްމީކޮށް ހަވާލުކުރުމުގެ ލިޔުން ނޮޅިވަރަންފަރު ކައުންސިލާ ހަވާލުކޮށްދެއްވީ ރައީސް ޑރ. މުޙައްމަދު މުޢިއްޒުއެވެ.
ރޭގެ ޖަލްސާގައި ނޮޅިވަރަންފަރުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސް މުޢިއްޒު ވަނީ، މި 100 ހައުސިން ޔުނިޓުން ނޮޅިވަރަންފަރުގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ނާންނަކަން ފާހަގަކުރައްވާފައެވެ. އެހެންކަމުން، އެރަށުގައި އިތުރު 250 ހައުސިން ޔުނިޓް އެޅުމަށް ސަރުކާރުން ނިންމަވާފައިވާކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، މި އިތުރު 250 ހައުސިން ޔުނިޓްގެ ތެރެއިން، އަންނަމަހު 100 ހައުސިން ޔުނިޓް އެޅުމަށް އެޗްޑީސީއާ ހަވާލުކުރައްވާނެ ކަމަށެވެ. އަދި މި ޔުނިޓްތައް ތަރައްޤީކުރާނީ ނޮޅިވަރަންފަރުގެ ރައްޔިތުންގެ ތެރެއިން ގޯތި އޮވެ ގޯތި އެޅޭނެ ގޮތް ނެތިފައި ތިބި ފަރާތްތަކުގެ ގޯތީގައި 3 ކޮޓަރީގެ ގެއެއް އެޅުމުގެ މަޝްރޫޢެއްގެ ގޮތުގައިކަމަށްވެސް ރައީސް މުޢިއްޒު ފާހަގަކުރެއްވިއެވެ.
މީގެ އިތުރުންވެސް ނޮޅިވަރަންފަރުގައި ބޯހިޔާވަހިކަމުގެ އިތުރު މަޝްރޫޢުތައް ކުރިއަށްގެންދަވާނެކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު