ލޯކަލް ކައުންސިލް އިންތިޚާބާއި އަންހެނުންގެ ތަަރައްޤީއަށް މަސައްކަތް ކުރާ ކޮމެޓީތަކުގެ އިންތިޚާބަށް ގިނަ އަދަދެއްގެ މުވައްޒިފުން ހޯދަން އިލެކްޝަންސް ކޮމިޝަނުން މިއަދު އިޢުލާނު ކޮށްފި އެވެ.
އެ ކޮމިޝަނުން ބުނި ގޮތުގައި އަންނަ އަހަރު އޮންނަ ލޯކަލް ކައުންސިލް އިންތިޚާބާއި އަންހެނުންގެ ތަަރައްޤީއަށް މަސައްކަތް ކުރާ ކޮމެޓީތަކުގެ އިންތިޚާބަށް އެ ކޮމިޝަންގެ މަސައްކަތްތަކަށް ބޭނުންވާ މުވައްޒިފުން ހޯދަން ބޭނުންވެ އެވެ. އެގޮތުން 260 ވުރެ ގިނަ މަޤާމަށް މުވައްޒިފުން ހޯދާ ކަމަށް ވަނީ ބުނެފަ އެވެ.
އޭގެ ތެރޭގައި އޮފިސަރުންނާއި ކޮންޓެންޓް ކްރިއޭޓަރުންނާއި ސީނިއާ އޮފިސަރުންނާއި ޑްރައިވަރުންނާއި މެއިންޓަނަންސް އޮފިސަރުންނާއި ސެކިއުރިޓީ އޮފިސަރުންނާއި މަސައްކަތު މީހުން ހިމެނެ އެވެ.
އަދި ލޮޖިސްޓިކް އޮފިސަރުންނާއި އެސިސްޓެންޓް މާސްޓާ ޓްރޭނަރުންނާއި ގްރެފިކްސް ޑިޒައިނަރުންނާއި ޓެކް އޮފިސަރުންނާއި ފޮޓޯ ގްރާފަރުންނާއި އޮފީސް އެސިސްޓެންޓްގެ މަޤާމަށް މީހުން ހޯދަން އިޢުލާނުކޮށްފައިވެ އެވެ.
ރާއްޖޭގައި ބޭއްވޭ އެންމެ ބޮޑު ދެ އިންތިޚާބަކީ ލޯކަލް ކައުންސިލް އިންތިޚާބާއި އަންހެނުންގެ ތަަރައްޤީއަށް މަސައްކަތް ކުރާ ކޮމެޓީތަކުގެ އިންތިޚާބެވެ. މި އިންތިޚާބުތައް އަންނަ އަހަރުގެ ކުރީކޮޅު ބޭއްވުމަށް ކޮމިޝަނުން ވަނީ މަސައްކަތް ކުރަމުންނެވެ.
ކިޔުންތެރިންގެ ހިޔާލު