ފުލެޓުތަކަށް ކުލި ނުދެއްކުމަކީ އެތައް ބައެއްގެ ހައްގަށް އަރައިގަތުން ކަމަށާއި އެގޮތަށް އަމަލުތައް ނުބެހެއްޓުމަށް އިލްތިމާސްކުރައްވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

ދިވެހިރާއްޖޭގެ އަޑުގެ “އަހާށޭ ބުނާނަން” ޕްރޮގްރާމްގައި ވާހަކަދައްކަވަމުން މިނިސްޓަރު ވިދާޅުވީ މިދިޔަ ސަރުކާރުން ފެށި ގެދޮރުވެރިޔާ ސްކީމުގެ ދަށުން ތަރައްގީކުރާ 4000 ފްލެޓުތައް ރަޖިސްޓްރީކޮށްދޭނީ ކުލި ނުވަތަ އިންސްޓޯލްމަންޓު ފައިސާ ދައްކައި ހަލާސް ކުރުމުން ކަމަށެވެ.

މުތައްލިބު ވިދާޅުވީ، ސަރުކާރުން ދޫކުރާ ފުލެޓުތަކަށް ކުލި ނުދެއްކުމަކީ އެތައް ބައެއްގެ ހައްގަށް އަރައިގަތުން ކަމަށެވެ. އަދި އެގޮތަށް އަމަލުތައް ނުބެހެއްޓުމަށް ވަރަށް ބޮޑަށް އިލްތިމާސްކުރައްވާ ކަމަށެވެ.

މިނިސްޓަރު ވިދާޅުވީ ރައްޔިތުންގެ މަޖިލިހުން މިހާރު ފާސްކުރަން ތައްޔާރުވަމުން އަންނަ ގެދޮވެރިވެރިކަމުގެ ބިލުން ވެސް އެ މައްސަލައަށް ބޮޑެތި ހައްލުތަކެއް ލިބިގެންދާނެ ކަމަށެވެ. އޭރުން ކުލި ނުދައްކާ މީހުން ގޮވައިގެން ކޯޓު މަރުހަލާ އަށް ނުގޮސް އަދި މާ ބޮޑު ދަތިތަކެއް ނެތި ކުލި ހޯދުމުގެ ފުރުސަތު ފަހިވާނެ ކަމަށް މިނިސްޓަރު ވިދާޅުވިއެވެ.

ހައުސިން މަޝްރޫއުތައް ހިންގަނީ ފީޒިބަލް ކަމަކަށް ވާތީ ކަމަށާއި އެ ލޯނުތައް އަނބުރާ ދައްކަން ޖެހެނީ އެކްސްރޯ އެކައުންޓެއް މެދުވެރިކޮށް ކަމަށް ވާއިރު ބޭންކުތަކަށް ވެސް ވާނުވާ ފެންނާނެ ކަމަށެވެ. އެހެންކަމުން އެއީ ވަރަށް ސީރިއަސް މައްސަލައެއް ކަމަށް މިނިސްޓަރު ވިދާޅުވިއެވެ.