ސަރަހައްދުގައި އަނެއްކާވެސް ހަމަނުޖެހުން އުފެއްދީ އިންޑިއާއިން ކަމަށް، ޕާކިސްތާނުގެ ނޭޝަނަލް ސެކިއުރިޓީ ކައުންސިލުން ބުނެފިއެވެ.
ޕާކިސްތާނަށާއި، ޕާކިސްތާނުން ވެރިކަންކުރާ ކަޝްމީރު ފަޅިއަށް އިންޑިއާ ސިފައިން ރޭގައި ދިން ވައިގެ ހަމަލާތަކާ ގުޅިގެން ޕާކިސްތާނުގެ ނޭޝަނަލް ސެކިއުރިޓީ ކޮމިޓީގެ ކުއްލި ބައްދަލުވުމެއް މިއަދު ވަނީ ބާއްވާފައެވެ. މި ބައްދަލުވުމުގެ ރިޔާސަތު ބެލެހެއްޓެވީ ޕާކިސްތާނުގެ ބޮޑުވަޒީރު ޝަހްބާޒް ޝަރީފެވެ.
މި ބައްދަލުވުމަށްފަހު އެ ކޮމިޓީން ނެރުނު ބަޔާނެއްގައި ބުނެފައިވަނީ، އެއްވެސް ސަބަބަކާ ނުލައި ޕާކިސްތާނަށް ހަމަލާދީ އިންޑިއާއިން ވަނީ، ބައިނަލްއަގްވާމީ އުސޫލުތަކާއި ގާނޫނުތަކާ ފާޅުކަން ބޮޑު ގޮތެއްގައި ހިލާފުވެފައި ކަމަށެވެ. އިންޑިއާގެ މި އަމަލުތަކަށް ޖަވާބުދާރީ ކުރުވެން ޖެހޭނޭ ކަމަށްވެސް ބުނެފައި ވެއެވެ.
އަދި އިންޑިއާއިން މި ފެށި ހަމަނުޖެހުންތަކުގެ ނުރައްކާތެރި މިންވަރު ދެނެގަނެ، އެކަމަށް ފިޔަވަޅު އެޅުމަށް ޕާކިސްތާނު ނޭޝަނަލް ސެކިއުރިޓީ ކޮމިޓީން ބައިނަލްއަގްވާމީ މުޖުތަމައަށް ގޮވާލާފައިވެއެވެ. އިންޑިއާ ސިފައިން ރޭގައި ވައިގެ ހަމަލާ ދީފައިވަނީ މަދަނީންގެ ސަރަހައްދުތަކަށް ކަމަށާއި، މިއީ ގަސްތުގައި ކުރި ކަމެއް ކަމަށްވެސް ބުނެފައި ވެއެވެ.
އެ ސަރަހައްދުތަކަކީ “ޓެރަރިސްޓުން” ގެ ސަރަހައްދުތަކެއް ކަމަށް އިންޑިއާއިން ބުނެފައިވަނީ “ޚިޔާލީފޮލައެއްގެ” މައްޗަށް ބިނާކޮށް ކަމަށްވެސް ޕާކިސްތާނު ނޭޝަނަލް ސެކިއުރިޓީ ކޮމިޓީގެ ބަޔާނުގައި ބުނެފައި ވެއެވެ. އިންޑިއާއިން ދިން ބޭއިންސާފު އަދި ޒިންމާދާރުކަންކުޑަ ހަމަލާތަކުގެ ސަބަބުން ވައިގެ ދަތުރުފަތުރުގެ ސިނާއަތަށް ހުރަސްއެޅި ނުރައްކާކޮށްފައިވާ ކަމަށްވެސް ބުނެފައި ވެއެވެ.
ހަމަ އެއާއެކު، ޕާކިސްތާނަށް ދިން ހަމަލާތަކާ ގުޅިގެން ކުރިމަތިވާނެ ނަތީޖާތަކުގެ ޒިންމާ އުފުލަން ޖެހޭނީ އިންޑިއާއިން ކަމަށްވެސް ނޭޝަނަލް ސެކިއުރިޓީ ކޮމިޓީން ބުނެފައި ވެއެވެ. ރިޕޯޓްތައް ބުނާގޮތުގައި، އިންޑިއާއިން ދިން ވައިގެ ހަމަލާތަކުގެ ރައްދުގައި އަޅާނެ ފިޔަވަޅުތަކަށް ޕާކިސްތާން މިހާރު ދަނީ ތައްޔާރުވަމުންނެވެ.
އިންޑިއާއިން ޕާކިސްތާނަށް ހަމަލާ މިދިނީ، އިންޑިއާގެ ބާރުގެދަށުގައި އޮންނަ ޖައްމޫ އެންޑް ކަޝްމީރުގައި ހަތިޔާރު އެޅި ގްރޫޕަކުން ހަމަލާދީ 26 މީހުން މަރާލުމާ ގުޅިގެން އެކަމުގެ ބަދަލު ހިފުމުގެގޮތުންނެވެ.
އެ ހަމަލާ ދިން ބަޔަކު ނުވެސް ބަލައި، އިންޑިއާއިން އެކަން އެޅުވީ ޕާކިސްތާނުގެ ބޮލުގައެވެ. ޕާކިސްތާނުން ތަކުރާރުކޮށް ގެންދިޔައީ އެ ތުހުމަތުތައް ދޮގުކުރަމުންނެވެ.
ކިޔުންތެރިންގެ ހިޔާލު