އިޒްރޭލް ޕާސްޕޯޓުގައި ރާއްޖެ އައުން މަނާކުރަން ނިންމި ނިންމުމާ ގުޅިގެން އަދި ޓޫރިޒަމަށް ގެއްލުމެއްވަމުން ނުދާ ކަމަށް ޓޫރިޒަމް މިނިސްޓަރު ތޯރިގު އިބްރާހިމް ވިދާޅުވެއްޖެއެވެ.

ފަލަސްތީނުގެ ރައްޔިތުންގެ ނަސްލު ނައްތާލުމަށް އިޒްރޭލުން ދޭ ހަމަލާތައް ހުއްޓާލަންދެން އިޒްރޭލު ޕާސްޕޯޓް މަނާކުރަން ނިންމައި، އިމިގްރޭޝަންގެ ގާނޫނަށް ރައްޔިތުންގެ މަޖިލީހުން އިސްލާހު ގެނެސްފައިވަނީ މިމަހުގެ 15 ގައެވެ. ހަމަ އެ ދުވަހު ރައީސް ޑރ. މުހައްމަދު މުއިއްޒު ވަނީ އެ އިސްލާހު ތަސްދީގުކުރައްވައިފައެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ތޯރިގު ވިދާޅުވީ އިޒްރޭލު ޕާސްޕޯޓް މަނާކުރުމުގެ ސަބަބުން ރާއްޖެ ބޮއިކޮޓް ކުރުން ގޮވާލުން ފަދަ ކެމްޕޭންތަކެއް ކުރިއަށް ނުދާ ކަމަށާއި ކޮންމެ ދުވަހަކު ވެސް އެކަން މޮނީޓާކުރަމުންދާ ކަމަށެވެ. އަދި އެކަމުން އެއްވެސް ގެއްލުމެއް ނެތް ކަމަށް މިނިސްޓަރު ވިދާޅުވިއެވެ.

ތޯރިގު ވިދާޅުވީ ކޮންމެ ދުވަހަކުވެސް ރާއްޖެ އަންނަ ފަތުރުވެރިންގެ އަދަދުތަކާއި މައުލޫމާތުތައް ބަލަމުންގެންދާ ކަމަށާއި އިޒްރޭލު ޕާސްޕޯޓު މަނާކުރުމުން ބޮއިކޮޓްކުރަން ގޮވާލުމުގެ ބަދަލުގައި ގިނަ ބަޔަކު އަންނަނީ އެ ނިންމުމަށް ތައުރީފުކޮށް ވާހަކަދައްކަމުން ކަމަށެވެ.

އިޒްރޭލު ޕާސްޕޯޓު މަނާކުރިކަން އަންގައި ދާދިފަހުން އިމިގްރޭޝަނުން ވެސް ވަނީ ގާނޫނަށް ގެނައި އެ ބަދަލު ފާހަގަކޮށް، ޓްރެވަލް އެޑްވައިޒަރީއެއް ނެރެފައެވެ.