ފ. ނިލަންދޫގެ ނަރުދަމާ ނިޒާމު އަޕްގްރޭޑްކުރުމުގެ މަސައްކަތް މެއި މަހުގެ ތެރޭގައި ފެށޭނެ ކަމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިންގ ޑިރެކްޓަރ އަބްދުލްމަތީން މުޙައްމަދު ހާމަކުރައްވައިފިއެވެ.

ނިލަންދޫގެ ނަރުދަމާ ނިޒާމާ ގުޅޭގޮތުން ރައްޔިތުންގެ ކަންބޮޑުވުންތަކަށް ޖަވާބުދެއްވަމުން އެމްޑީ މަތީން ވިދާޅުވީ، މިހާރު އެރަށުގައި ޤާއިމުކޮށްފައިވާ ވެކިއުމް ނަރުދަމާ ނިޒާމުގެ ބަދަލުގައި އެންމެ ޒަމާނީ ގްރެވިޓީ ނަރުދަމާ ނިޒާމެއް ތަޢާރަފުކުރުމަށް ނިންމާފައިވާ ކަމަށެވެ. މި އައު ނިޒާމަކީ މިހާރު ދިމާވަމުންދާ މައްސަލަތަކަށް ދާއިމީ ހައްލެއް ގެނެސްދޭނެ ނިޒާމެއް ކަމުގައި އެމްޑީ ފާހަގަކުރެއްވިއެވެ.

އައު ނަރުދަމާ ނިޒާމުގެ ޑިޒައިން މަސައްކަތަށް ބޭނުންވާ ބިންތައް ކަނޑައެޅުމާއި، ލޭންޑް ސާރވޭ އަދި ޓޮޕޮގްރަފިކް ސާރވޭގެ މަސައްކަތް ނިމިފައިވާ ކަމަށް އެމްޑީ މަތީން ހާމަކުރެއްވިއެވެ. އަދި ޑިޒައިން ނިންމުމަށްފަހު، ކަމާބެހޭ އިދާރާތަކުގެ ހުއްދަތައް ހޯދުމަށްފަހު މެއި މަހުގެ ތެރޭގައި މަޝްރޫޢުގެ ޢަމަލީ މަސައްކަތް ފެށޭނެ ކަމަށް ވިދާޅުވިއެވެ.

މި މަޝްރޫޢު ނިންމުމަށް ރޭވިފައިވަނީ 2026 ވަނަ އަހަރުގެ ފަހުކޮޅުގައި ކަމަށް އެމްޑީ މަތީން އިތުރަށް ހާމަކުރެއްވިއެވެ. މި އައު ނިޒާމު ޤާއިމުކުރުމާއެކު، ނިލަންދޫގެ ރައްޔިތުންނަށް ދިމާވަމުންދާ ނަރުދަމާގެ މައްސަލަތަކަށް ދާއިމީ ހައްލެއް ލިބިގެންދާނެ ކަމަށް އުންމީދުކުރެވެއެވެ.