ޔުއެފާ ނޭޝަންސް ލީގުގެ ކުއާޓަރ ފައިނަލް ދެވަނަ ލެގުގައި ފްރާންސް ވަނީ ކްރޮއޭޝިއާ ބަލިކޮށް، މުބާރާތުގެ ސެމީ ފައިނަލަށް ދަތުރުކޮށްފައެވެ. މި ކާމިޔާބީ ހޯދުމަށް ފްރާންސްއަށް ޖެހުނީ ޕެނަލްޓީ ޝޫޓްއައުޓަކަށް ދާށެވެ.
ފުރަތަމަ ލެގުގައި ކްރޮއޭޝިއާ 2-0 އިން މޮޅުވެފައިވާއިރު، ރޭ ފްރާންސްގައި ކުޅުނު މެޗުން ފްރާންސް ވެސް ހަމަ އެ ނަތީޖާއިން މޮޅުވިއެވެ. މިގޮތުން މެޗުގެ ނަތީޖާ ނިންމާލެވުނީ ޕެނަލްޓީ ޝޫޓްއައުޓަކުންނެވެ.
ޕެރިހުގެ ސްޓޭޑް ޑި ފްރާންސްގައި ކުޅުނު މި މެޗުގައި ފުރަތަމަ ހާފުގައި އެއްވެސް ޓީމަކަށް ލަނޑެއް ނުޖެހުނު ނަމަވެސް، ފްރާންސްއަށް ވަނީ ގިނަ ފުރުސަތުތަކެއް ލިބިފައެވެ.
2021 ވަނަ އަހަރުގެ ޗެމްޕިއަން ފްރާންސްއިން މި މެޗުގައި ފާހަގަކޮށްލެވޭ ކުޅުމެއް ދެއްކިއެވެ. އެ ޓީމުގެ ފުރަތަމަ ލަނޑު ޖެހީ މެޗުގެ 52 ވަނަ މިނެޓުގައި މައިކަލް އޮލިސޭއެވެ. އެއީ ހިލޭ ޖެހުމަކުންނެވެ.
މެޗުގެ ފުރިހަމަ ވަގުތު ހަމަވާން 10 މިނެޓަށް ވެފައިވަނިކޮށް، މި ސީޒަނުގައި އުސްމާން ޑެމްބެލޭ ވަނީ އިތުރު ލަނޑެއް ޖަހައި މެޗުގެ އެގްރިގޭޓް ނަތީޖާ 2-2 އަށް ހަމަހަމަކޮށްފައެވެ.
މެޗުގެ އިތުރު ވަގުތުގައި އެއްވެސް ޓީމަކަށް ލަނޑެއް ނުޖެހުނެވެ. އެހެންކަމުން ޕެނަލްޓީ ޝޫޓްއައުޓުގައި ފްރާންސް ވަނީ 5-4 އިން މޮޅުވެފައެވެ.
ކްރޮއޭޝިއާގެ ފުރަތަމަ ފަސް ޕެނަލްޓީގެ ތެރެއިން ދެ ޕެނަލްޓީ ފްރާންސްގެ ގޯލްކީޕަރު މައިކް މައިގްނަން ވަނީ ހުއްޓުވާލާފައެވެ. ނަމަވެސް ފްރާންސްގެ ތިއޯ ހަނާންޑޭޒް އާއި ޖޫލްސް ކޫންޑޭގެ ޕެނަލްޓީތައް ނާކާމިޔާބުވުމާ ގުޅިގެން އިތުރު ޕެނަލްޓީތަކެއް ޖަހަން ޖެހުނެވެ. ކްރޮއޭޝިއާގެ ޖޮސިޕް ސްޓެނިސިޗްގެ ހަތްވަނަ ޕެނަލްޓީ މައިގްނަން ހުއްޓުވާލުމާ އެކު، ފްރާންސްއަށް ކާމިޔާބީ ހޯދައިދިނީ ޑަޔޮޓް އުޕެމަކާނޯއެވެ.
ކިޔުންތެރިންގެ ހިޔާލު