ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، އިދިކޮޅު އެމްޑީޕީގެ އެކްޓިވިސްޓް މަރިޔަމް ޒުބައިރުގެ ގަޔަށް ކަޅުތެޔޮ ޖެހުމުގެ ހާދިސާ ހަރުކަށި އިބާރާތުން ކުށްވެރިކުރައްވައިފިއެވެ.
އެކްސްގައި ކުރެއްވި ޕޯސްޓެއްގައި މެޑަމް ސާޖިދާ ވިދާޅުވެފައިވަނީ، މިފަދަ އަމަލުތަކަކީ އެއްވެސް ހާލެއްގައި ގަބޫލުކުރެވޭނެ ކަމެއް ނޫން ކަމަށެވެ. އަދި މި ދަނޑިވަޅުގައި އިތުރު ނުތަނަވަސްކަން އުފެދިޔަ ނުދިނުމަށް އެންމެންނަށް އިލްތިމާސްކުރައްވާފައިވެއެވެ. މީގެ އިތުރުން، އަދުލު އިންސާފު ގާއިމުކުރުމުގެ މަރުހަލާ ފުރިހަމައަށް ހިންގުމަށް ފުރުސަތު ދިނުމަށްވެސް އެކަމަނާ ގޮވާލައްވާފައިވެއެވެ.
I strongly condemn the act of splashing black oil on MDP activist Mariyam Zubair last night. Such attacks and harassment are completely unacceptable. I call on everyone to avoid escalating tension at a time like this and allow for the process of justice to be facilitated.
— First Lady Sajidha Mohamed (@sajidhaamohamed) March 17, 2025
މި ހާދިސާ ހިނގާފައިވަނީ، އިދިކޮޅު އެމްޑީޕީން މާލޭގައި ކުރިއަށްގެންދާ މުޒާހަރާތަކުގެ ތެރެއިން ރޭ ބޭއްވި މުޒާހަރާއެއް ނިމުމަށްފަހު، މަރިޔަމް ޒުބައިރު ގެއަށް ދަނިކޮށެވެ. އޭނާގެ ބުނުމުގައި، ހެލްމެޓު އަޅައިގެން ތިބި ބަޔަކު އޭނާގެ ގަޔަށް ކަޅުތެޔޮ ޖަހާފައިވެއެވެ.
މި ހާދިސާއާ ގުޅިގެން، މެޑަމް ސާޖިދާ އިތުރަށް ވިދާޅުވެފައިވަނީ، މީހުންނަށް ހަމަލާދީ ދުއްތުރާކުރުމަކީ އެއްވެސް ގޮތަކަށް ބަލައިގަނެވޭނެ ކަމެއް ނޫން ކަމަށެވެ. އަދި މިފަދަ ނާޒުކު ވަގުތެއްގައި އެންމެން އެކުގައި މަސައްކަތްކޮށް، އިތުރު ހަމަނުޖެހުންތައް ހުއްޓުވުމަށް ގޮވާލައްވާފައިވެއެވެ.
