ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މަސައްކަތްތައް ހުރީ އާންމު ރައްޔިތުންނަށް ވީހާވެސް ގިނަ ފަސޭހަތަކެއް ލިބޭނެ މިސްރާބަށްކަމަށް އެ ކުންފުނީގެ ޗެއާމަން އިބްރާހިމް ނާސިފް ވިދާޅުވެއްޖެއެވެ.
ނާސިފް މިހެން ވިދާޅުވީ އިއްޔެ ހުޅުމާލޭގައި ބިނާކުރަމުންދާ ލަގްޒަރީ އެޕާޓްމަންޓް އިމާރާތެއްކަމަށްވާ ކަނޑޫފާ ރެސިޑެންސް އިނޯގްރޭޓްކުރުމުގެ ރަސްމިއްޔާތުގައި ވާހަކަދައްކަވަމުންނެވެ.
ނާސިފް ވިދާޅުވީ،
އެޗްޑީސީގެ މަސައްކަތް މިހާރު ހުރިހާގޮތަކުންވެސް ބައްޓަންކުރެވިފައިވަނީ އާންމު ރައްޔިތުންނަށް ވީހާވެސް ގިނަ ފަސޭހަކަމާއިއެކު ޚިދުމަތް ލިބޭނެ ގޮތަކަށް. ރައްޔިތުންނަށް ލަބާ އާއި މަންފާ ލިބޭނެ. އަދި ދެފުށް ފެންނަ ގޮތެއްގެ މަތިން މަސައްކަތްތައް ކުރިއަށް ގެންދަންޖެހޭނީ އެގޮތަށް މަސައްކަތް މިކުރަނީ.
އިތުރަށް ވާހަކަފުޅު ދައްކަވަމުން ނާސިފް ވިދާޅުވީ، މިފަދަ ޕްރޮޖެކްޓެއް ކުރިއަށް ގެންދާއިރު އެކި މަރުހަލާތަކުގައި ކުރެވެމުންދާ މަސައްކަތްތައް ރައްޔިތުންނަށް ފެނިގެންދާގޮތަށް ދެފުށް ފެންނަ ސިޔާސަތެއް ގެންގުޅުން މުހިންމުކަމަށެވެ. އަދި ކަނޑޫފާ އިންވެސްޓްމެންޓުން އާންމު ފަރާތްތަކަށް މަސައްކަތްތަކުގެ މައުލޫމާތު ދިނުމުގެ ގޮތުން ހުޅުވާލެވިފައިވާ މާހައުލެއްގައި މައުލޫމާތުތައް ދިނުމުގެ މަސައްކަތްތައް ކުރިއަށް ގެންދިއުމަކީވެސް މުހިންމު ކަމެއްގެ ގޮތުގައި ދެކިވަޑައިގަންނަވާކަމަށް ވިދާޅުވިއެވެ.
މީގެއިތުރުން، ނާސިފް ވިދާޅުވީ މިފަދަ ހައުސިން ޕްރޮޖެކްޓްތަކަކީ ރައީސް ޑރ. މުޙައްމަދު މުޢިއްޒުގެ ސަރުކާރުން ވެފައިވާ ވައުދުތަކުގެ ތެރެއިން އެންމެ މުހިންމު ވައުދުކަމަށެވެ. އެހެންކަމުން މިހާރު އެންމެ އިސްކަމެއް ދީގެން އެޗްޑީސީންވެސް އާންމު ރައްޔިތުންގެ ދިރިއުޅުމަށް ފަސޭހަތަކެއް ލިބި ފަހިވެގެންދާ ކަންކަމަށް ސަމާލުކަން ދީގެން މަސައްކަތްކުރަމުންދާކަމަށް ފާހަގަކުރެއްވިއެވެ.
