ރައްޔިތުންގެ މަޖިލީހުގެ މެންބަރުންނަށް ކަނޑައަޅާފައިވާ ބޮޑު ހެލްތު އިންޝުއަރެންސް ކަނޑާލަން ގޮވާލައި ހުށަހެޅި އީ-ޕެޓިޝަނަށް ބަހުސް ކުރުމަށް ރައްޔިތުންގެ މަޖިލީހުގެ ތަޅުމަށް ފޮނުވަން ޕެޓިޝަން ކޮމިޓީން ނިންމައިފިއެވެ.
މި ޕެޓިޝަނުގައި 7225 މީހުން ސޮއިކޮށްފައިވާއިރު، މިއީ އެންމެ ގިނަ މީހުން ދެވަނައަށް ސޮއިކުރި އީ-ޕެޓިޝަނެވެ. އެހެންކަމުން މަޖިލީހުގެ އީ-ޕެޓިޝަން ގަވާއިދުގައިވާ ތްރެޝްހޯލްޑްގެ ޝަރުތުތައް ފުރިހަމަވެފައިވާ ކަމަށް ކޮމިޓީން ވަނީ ކަނޑައަޅާފައެވެ. އެކަމާ ގުޅިގެން އިއްޔެ ބޭއްވި ޕެޓިޝަން ކޮމިޓީގެ ބައްދަލުވުމުގައި ވަނީ އެ ޕެޓިޝަނާ މެދު މަޝްވަރާކޮށް، މަޖިލިސް ތަޅުމުގައި ބަހުސް ކުރުމަށް ފާސްކޮށްފައެވެ.
ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނު އޮންނަ ގޮތުން މަޖިލީހުގެ ކޮންމެ މެންބަރަކާއި، މެންބަރުގެ އަނބިމީހާ ނުވަތަ ފިރިމީހާ އަދި އުމުރުން 18 އަހަރު ނުފުރޭ ދަރިންނަށް ރާއްޖެއާއި ސާކް އަދި އާސިއާން ގައުމުތަކުން ސިއްހީ ފަރުވާ ލިބޭނެ މެޑިކަލް އިންޝުއަރެންސް ސްކީމެއް ހަމަޖައްސައިދޭން ޖެހެއެވެ. އަދި މެންބަރުކަން ކޮށްފައިވާ ފަރާތްތަކަށްވެސް އެފަދަ އިންޝުއަރެންސް ސްކީމެއްގެ ދަށުން ބޭސްފަރުވާ ކޮށްދޭން ޖެހޭނެ ކަމަށް ބަޔާންކޮށްފައިވެއެވެ.
މި ޕެޓިޝަން ހުށަހަޅާފައިވަނީ ސޯޝަލް މީޑީއާ އެކްޓިވިސްޓް މިދުއަމް ސައުދުއެވެ. އާންމު ރައްޔިތުންނަށް ނުލިބޭ ފެންވަރުގެ ބޮޑު ސިއްހީ އިންޝުއަރެންސެއް ރައްޔިތުންގެ ޓެކްސް ފައިސާއިން މެންބަރުންނަށް ދިނުމަކީ އެއްވެސް ސިޔާސީ ނިޒާމެއް ހަމަޖެހިފައިވާ ގޮތެއް ނޫން ކަމަށް އެ ޕެޓިޝަނުގައި ބަޔާންކޮށްފައިވެއެވެ. އަދި ދުނިޔޭގެ މުއްސަނދި ގައުމުތަކުގައިވެސް ކުރީގެ މެންބަރުންނަށް އުމުރުދުވަހުގެ ހެލްތު އިންޝުއަރެންސް ދޭ އުސޫލެއް ނެތް ކަމަށް ވެއެވެ.
ދައުލަތުން ދޭ އަސާސީ ސިއްހީ އިންޝުއަރެންސަކީ ހުރިހާ ރައްޔިތުންނަށް ވެސް ހަމަހަމަ އުސޫލަކުން ލިބެންޖެހޭ އެއްޗަކަށް ވާންޖެހޭނެ ކަމަށް ޕެޓިޝަނުގައި ވެއެވެ. އެހެންކަމުން ކުރީގެ އަދި މިހާރުގެ މަޖިލިސް މެންބަރުންނާއި އެ މެންބަރުންގެ އާއިލާތަކަށް ލިބޭ ހާއްސަ ސިއްހީ އިންޝުއަރެންސް އިނާޔަތްތައް ހުއްޓާލައި، އާންމު ރައްޔިތުންނެކޭ އެއްފަދައިން ގައުމީ ސިއްހީ އިންޝުއަރެންސް ނިޒާމުގެ ތެރެއިން ބޭސްފަރުވާ ލިބޭގޮތަށް ގާނޫނުތަކަށް ބަދަލު ގެނައުމަށް ޕެޓިޝަނުގައި ގޮވާލާފައިވެއެވެ.
ކިޔުންތެރިންގެ ހިޔާލު