އެމްޑީޕީން “ރަށްވެހި ތަރައްގީ” ގެ ނަމުގައި މިއަދު ފެށި އިންވެސްޓްމެންޓް ފޯރަމްގައި ލޯކަލް ކައުންސިލްތަކުން ހުށަހެޅި 76 މަޝްރޫއަކަށް އިންވެސްޓްމެންޓް ހޯދުމުގެ ފުރުސަތު ހުޅުވާލައިފިއެވެ.
މި ފޯރަމަކީ ކައުންސިލުތަކުން ރަށްރަށުގައި ހިންގުމަށް ރާވާފައިވާ ތަރައްގީގެ ތަފާތު މަޝްރޫއުތަކަށް ބޭނުންވާ ފައިސާއާއި އިންވެސްޓްމެންޓް ހޯދުމުގެ މަގު ފަހިކޮށްދިނުމުގެ މަގުސަދުގައި ބާއްވާ ހަރަކާތެކެވެ.
އެމްޑީޕީން ހާމަކޮށްފައިވާ ގޮތުގައި މި ފޯރަމަށް ހުށަހަޅާފައިވާ ހުށަހެޅުންތަކުގެ ތެރެއިން ސާޅީސް ހުށަހެޅުމެއްގައި މަޝްރޫއަށް ބޭނުންވާ އިންވެސްޓްމެންޓްގެ އަދަދު ބަޔާންކޮށްފައިވެއެވެ. އެ ހުށަހެޅުންތަކުގެ ޖުމްލަ އަގު ތިންސަތޭކަ ހަ މިލިއަން އެމެރިކާ ޑޮލަރަށް އަރައެވެ.
ފޯރަމަށް ހުށަހެޅި މަޝްރޫއުތަކުގެ ތެރެއިން އަގުގެ ގޮތުން އެންމެ ބޮޑު ޕްރޮޕޯސަލެއް ހުށަހަޅާފައިވަނީ ތިނަދޫ ސިޓީ ކައުންސިލުންނެވެ. އެއީ ކާޑެއްދޫ އެއާޕޯޓު ތަރައްގީކުރުމާއި ދެކުނުގެ ސީޕްލޭން ހަބެއް ގާއިމުކުރުމުގެ މަޝްރޫއެވެ. މީގެ އިތުރުން ވެސް އިތުރު ފަސް މަޝްރޫއަކަށް ތިނަދޫ ކައުންސިލުން ވަނީ ޕްރޮޕޯސަލް ހުށަހަޅައިފައެވެ.
މާލޭ ސިޓީ ކައުންސިލުން ވަނީ މާލޭގައި ކްލައިމެޓް ޕާކަކާއި ވޯޓާފްރޮންޓް ކްލައިންބިން ވޯލްއެއްގެ އިތުރުން ކަސްރަތުކުރާ ސަރަހައްދެއް ގާއިމުކުރުމަށް ޕްރޮޕޯސަލް ހުށަހަޅައިފައެވެ.
އައްޑޫ ސިޓީ ކައުންސިލާއި ފުވައްމުލަކު ސިޓީ ކައުންސިލުން ސޯލާ ހޯމް ބެޓެރީ މަޝްރޫއެއް ހިންގުމަށް އިންވެސްޓަރުން ހޯދަމުންދާއިރު، ކުޅުދުއްފުށީ ސިޓީ ކައުންސިލުން ވަނީ ގޭދޮށު އިންޖީނުގޭގެ ނަމުގައި އަވިން ހަކަތަ އުފައްދާ މަޝްރޫއެއް ހުށަހަޅައިފައެވެ.
އައްޑޫ އަދި ފުވައްމުލަކު ސިޓީ ކައުންސިލުން ޖުމްލަ އަށް މަޝްރޫއެއް ހިންގުމަށް ފައިސާ ހޯދަން ހުށަހަޅާފައިވާއިރު، އޭގެ ތެރޭގައި އައްޑޫގައި ކޮންވެންޝަން ސެންޓަރެއް ބިނާކުރުން ހިމެނެއެވެ. ސިޓީތަކުގެ އިތުރުން ސައްބީސް ރަށު ކައުންސިލަކުން ވެސް ވަނީ މި އިންވެސްޓްމެންޓް ފޯރަމަށް ޕްރޮޕޯސަލްތައް ހުށަހަޅައިފައެވެ.
ކިޔުންތެރިންގެ ހިޔާލު