ރައްޔިތުންގެ މަޖިލީހުގެ މިއަހަރުގެ 3 ވަނަ ދައުރުގެ ޖަލްސާތައް އަންނަ ހޯމަ ދުވަހު ފަށަން ތާވަލުކޮށްފިއެވެ.
ރައްޔިތުންގެ މަޖިލީހުގެ ގަވާއިދުގައިވާގޮތުން ކޮންމެ އަހަރަކު މަޖިލީހުގެ ޖަލްސާތައް ކުރިއަށްދާނީ 3 ދައުރަކަށް ބަހާލައިގެންނެވެ.
ރައްޔިތުންގެ މަޖިލީހުގެ ގަވާއިދުގެ ދަށުން 3 ވަނަ ދައުރުގެ ޖަލްސާތައް އޮކްޓޫބަރު މަހުގެ ފުރަތަމަ ހަފުތާގައި ބާއްވަންޖެހެއެވެ. މަޖިލީހުން ވިދާޅުވެފައިވާ ގޮތުގައި މި ޖަލްސާތައް ފަށަން ތާވަލުކޮށްފައިވަނީ މި މަހުގެ 5 ވަނަ ދުވަހުއެވެ.
މަޖިލީހުން އާންމުކޮށްފައިވާ އެޖެންޑާގައިވާގޮތުން މިއަހަރުގެ 3 ވަނަ ދައުރުގެ ފުރަތަމަ ޖަލްސާއަށް މަޖިލީހުގެ ރައީސްގެ މޭޒުން 2 ކަމެއް ހުށަހަޅުއްވާނެއެވެ. އަދި ސަރުކާރުގެ ފަރާތުން މަޖިލީހަށް ހުށަހަޅުއްވާފައިވާ ކުށްކޮށްގެން ހޯދާ މުދަލާގުޅޭ ބިލުގެ އިބްތިދާޢީ ބަހުސްވެސް މި ޖަލްސާގައި ފަށާނެއެވެ.
މި ޖަލްސާއަށް މަޖިލީހުގެ ރައީސްގެ މޭޒުން ހުށަހެޅުމަށް ނިންމަވާފައިވަނީ މީރާއަށް ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ބޭފުޅަކު އައްޔަން ކުރުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ އާއި “މައްކަތުލް މުކައްރަމާ ކޮންވެންޝަން އޮފް ދަ މެންބަރ ސްޓޭޓްސް އޮފް ދަ އޯގަނައިޒޭޝަން އޮފް އިސްލާމިކް ކޯޕަރޭޝަން އޮން އެންޓި-ކޮރަޕްޝަން ލޯ އެންފޯސްމަންޓް ކޯޕަރޭޝަން” މުއާހަދާގައި ބައިވެރިވުމާ ގުޅޭގޮތުން މަޖިލީހުގެ ރުހުން ހޯދުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލައެވެ.
މަޖިލީހުގެ ޤަވާއިދުގައިވާ ގޮތުން ކޮންމެ އަހަރަކުވެސް 3 ދައުރަކަށް ބަހާލައިގެން ޖަލްސާތައް ކުރިއަށްދާނެއެވެ. ފުރަތަމަ ދައުރުގެ ޖަލްސާތައް ކުރިއަށްދާނީ، ފެބުރުވަރީ މަހުގެ އެއްވަނަ ދުވަހުން ފެށިގެން މޭ 15ގެ ނިޔަލަށް ކަމަށް ވަނީ ގަވާއިދުގައި ބަޔާންކޮށްފައެވެ. އަދި ދެވަނަ ދައުރު ޖޫން މަހުގެ އެއްވަނަ ދުވަހުން ފެށިގެން އޮގަސްޓް މަހުގެ 15ވަނަ ދުވަހާ ހަމައަށް ކުރިއަށްދާއިރު، ތިންވަނަ ދައުރުގެ ޖަލްސާތައް ކުރިއަށްދާނީ އޮކްޓޫބަރު މަހުގެ އެކަކުން ފެށިގެން ނޮވެންބަރު މަހުގެ ނިޔަލަށް ކަމަށް ވަނީ ބަޔާންކޮށްފައެވެ.
މަޖިލީހުގެ ދައުރު ހަމަވި ނަމަވެސް މިމުއްދަތުގެ ތެރޭގައި މަޖިލީހަށް ހުށަހަޅާފައިވާ މުހިންމު މަސައްކަތްތައް ނުނިމޭނަމަ އެ ދައުރެއްގެ މުއްދަތު އިތުރު ކުރެއެވެ. މިގޮތަށް ދައުރުގެ މުއްދަތު އިތުރު ކުރެވޭނީ، ރައްޔިތުންގެ މަޖިލީހުގެ މެންބަރުންގެ މެދުގައި ނަގާ ވޯޓަކުން ފާސް ކޮށްގެންނެވެ. އެގޮތުން، މިއަހަރުގެ ފުރަތަމަ ދައުރާއި ދެވަނަ ދައުރުގެ ޖަލްސާތައްވެސް ވަނީ އިތުރު މުއްދަތަކަށް ކުރިއަށްގެންގޮސްފައެވެ.
މިއަހަރުގެ ފުރަތަމަ ދައުރުގައި މަޖިލިސް ޗުއްޓީއަށް ނުދެއެވެ. މުހިންމު މަސައްކަތްތަކެއް ހުރުމުން ފުރަތަމަ ދައުރުގެ ޖަލްސާތައް ދަންމާލައި، ދެވަނަ ދައުރު ފަށާފައިވަނީ އެ ޖަލްސާތައް ނިމުނު ހަފުތާއަށްފަހު ޗުއްޓީއަށް ނުގޮސް ތިއްބައެވެ. ދެވަނަ ދައުރު ނިންމާލައި މަޖިލިސް ޗުއްޓީއަށް ދިޔައީ މިދިޔަ އޮގަސްޓް މަހުގެ 26ވަނަ ދުވަހުއެވެ.
ކިޔުންތެރިންގެ ހިޔާލު