މާލީ އުސޫލުތަކާ ހިލާފްވުމުގައި ދިގު މުއްދަތެއް ހޭދަކޮށްފައިވާ މެންޗެސްޓަރ ސިޓީއަށް ދޭން ޖެހޭނީ އެހެން ކްލަބްތަކަށްވެސް މިސާލަކަށް ވާވަރުގެ ހަރުކަށި އަދަބު ކަމަށް ލަލީގާގެ ރައީސް ހަވިއޭ ޓެބާސް ވިދާޅުވެއްޖެއެވެ.
މެންޗެސްޓަރ ސިޓީގެ މައްސަލައާ ގުޅޭގޮތުން ވާހަކަދައްކަމުން ވިދާޅުވީ އަހަރުތަކެއް ވަންދެން ސިޓީން މާލީ ހިސާބުތައް އޮޅުވާލާ, މާލީ އުސޫލުތައް މުގުރާލުމުން ދޭ އަދަބު ވާން ޖެހޭނީ ޔޫރަޕްގެ އެހެން ޓީމްތަކަށްވެސް އިންޒޭރަކަށް ކަމަށެވެ. ޕްރިމިއަރ ލީގުން ވަނީ މިދިޔަ ދިހަ އަހަރުގެ ތެރޭގައި މެންޗެސްޓަރ ސިޓީން އެލީގުގެ މާލީ އުސޫލުތަކާ ތަކުރާރުކޮށް ހިލާފްވެ, އުސޫލުތައް މުގުރާލާފައިވާ ކަމަށް ބުނެފައެވެ. ސިޓީއާ ދެކޮޅަށް ހުށަހެޅި 115 މައްސަލައިގެ ތެރެއިން 114 މައްސަލަ ސާބިތުވާ ކަމަށް ކަނޑައެޅުމުން ޓެބާސް ވިދާޅުވީ އޭނާ އަބަދުވެސް އެވާހަކަ ދައްކަމުން އައި ކަމަށެވެ. އެކަންބޮޑުވުން 2017 ވަނަ އަހަރުވެސް ފާޅުކުރި ކަމަށް ވިދާޅުވިއެވެ. އެކަމަކު މިހާރު ސިޓީން ތަކުރާރުކޮށް މާލީ އުސޫލުތައް މުގުރާލިކަން ސާބިތުވާތީ ހަރުކަށި އަދަބު ދޭން ޖެހޭނެކަމަށް ޓެބާސް ވިދާޅުވިއެވެ.
ޓެބާސް ވަނީ މީގެކުރިން ޔުއެފާއިން ސިޓީ ސަސްޕެންޑް ކުރަން ދިން އަދަބު އިސްތިއުނާފްކޮށް, ސިޓީން ކާމިޔާބުކުރި ކުރުމާ ގުޅޭގޮތުންވެސް ވާހަކަ ދައްކާފައެވެ. ޓެބާސް ވިދާޅުވީ ޔުއެފާއިން އޭރު ދެއްކި ވާހަކައާއި ދިން އަދަބުވެސް ރަނގަޅުކަން މިހާރު ސާބިތުވާ ކަމަށެވެ. 2020 ވަނަ އަހަރު ޔުއެފާއިން ސިޓީ ދެ އަހަރަށް ޗެމްޕިއަންސް ލީގުން ސަސްޕެންޑް ކުރިއެވެ. އެއީ 2012-2016 އަށް ސްޕޮންސަރޝިޕް ހިސާބުތަކުގައި އޮޅުވާލާފައިވާކަމަށް ބުނާ މައްސަލައިގައެވެ. އެކަމަކު ސިޓީން ވަނީ ކޯޓް އޮފް އާބިޓްރޭޝަން ފޯ ސްޕޯރޓްގައި އިސްތިއުނާފްކޮށް, ކާމިޔާބު ހޯދާފައެވެ.
އޭނާ ވިދާޅުވީ ދިހަ އަހަރު މާލީ އުސޫލުތަކާ ހިލާފަށް އަމަލުކޮށް, އޮޅުވާލުމަކީ ވަރަށް ސީރިއަސް މައްސަލައެއް ކަމަށެވެ. އެހެން ކްލަބްތަކަށް އިންޒާރެއްގެ އިތުރުން ތަކުރާރުކޮށް ގަވާއިދުތައް މުގުރާލަމުން ދިއުމުން ހަރުކަށި އަދަބު ސިޓީއަށ ހައްގުކަމަށް ޓެބާސް ވިދާޅުވިއެވެ.
އިނގިރޭސި ޕްރިމިއާ ލީގުގެ މާލީ ގަވާއިދުތަކާ ހިލާފަށް ހިންގާފައިވާ ސީރިއަސް 115 މައްސަލާގައި މެންޗެސްޓަރ ސިޓީ އާއި ދެކޮޅަށް އެލީގުން އުފުލި ދައުވާތައް ސާބިތުބާކަމަށް ވަނީ ނިންމާފައެވެ.
ޕްރިމިއާ ލީގުން ނެރުނު 1,545 ބަހުގެ ބަޔާނުގައި ވަނީ އެކްލަބަށް މަލީގޮތުން އެހީތެރިވެދޭ ފަރާތްތަކާއެކު ލީގަށް އޮޅުވާލުމުގެ ގޮތުން ކޮންޓްރެކްޓްތަކެއް ހަދާ އެކްލަބަށް ލިބުނު އާންމުދަނީ އޮޅުވާލާފައިވާކަމަށެވެ. މިގޮތުން 830 މިލިއަން ޕައުންޑް އެކްލަބަށް ނުގަވައިދުން ލިބިފައިވާކަން ލިޔެކިޔުންތަކުން އެނގޭކަމަށް ޕްރިމިއަރ ލީގުން ހާމަކުރެއެވެ. އެހެން ކަމުން 2009-2010 ވަނަ ސީޒަނުން ފެށިގެން 2017-2018ވަނަ އަހަރުގެ ސީޒަނާއި ދެމެދު ލީގުގެ މާލީ ގަވައިދުތަކާއި ސިޓީއިން ހިލާފުވުމާއި ގުޅިގެން އެލީގުން އުފުލި ހުރިހާ ދައުވާއެއް އެކްލަބްގެ މައްޗަށް ސާބިތުވާކަމަށް ޕްރިމިއަރ ލީގުން ހާމަކުރެއެވެ. މިކަމާ ގުޅިގެން މިނިވަން ކޮމިޝަނުން ބޭއްވި އަޑު އެހުންތަކަށްފަހު ހާމަވެގެންދިޔަގޮތުގައި ސިޓީއިންވަނީ އެކްލަބުގެ ހަރަދުތައް ކުޑަކަން ދެއްކުމުގެ ގޮތުން އެކްލަބްގެ ސްޕޮންސަރުންނާއެކު އޮޅުވާލުމުގެ އެގްރީމަންޓް ތަކެއް ހަދާ އެކްލަބަށް ނުލިބޭ އާންމު ދަނީތަކެއް ލިބުނު ކަމަށް ދައްކާފައެވެ. ޕްރިމިއަރ ލީގުން މިދައުވާތައް ސާބިތުވާކަން ހާމަކޮށް ސިޓީއަށްވަނީ އޮކްޓޯބަރު މަހުގެ ދެވަނަ ދުވަހާއި ހަމައަށް އެޕީލް ކުރުމުގެ ފުރުސަތު ދީފައެވެ.
ޕްރިމިއަރ ލީގުން ސިޓީ އާއި ދެކޮޅަށް އުފުލި 115 ދައުވާ އާއި ގުޅިގެން މިނިވަން ކޮމިޝަނުން ކުރިއަށް ގެންދިޔަ އަޑުއެހުންތަކަށްފަހު ސިޓީގެ މައްޗަށް އޭގެ ތެރެއިން 114 ދައުވާ ސާބިތުވާކަމަށް އެކޮމިޝަނުން ނިންމިކަމުގެ ހަބަރު އިނގިރޭސި މީޑިއާއިން މިދިޔަ ހަފްތާގެ ތެރޭގައިވަނީ ލީކު ކޮށްލާފައެވެ. މިކަމާއި ގުޅިގެން މިދިޔަ ހަފްތާއެއް ހާ ދުވަހުގެ ތެރޭގައި ސިޓީގެ މިކަންތަކާއި ގުޅިގެން އެކިފަރާތްތަކުން ތަފާތު ހިޔާލު ތަކާއި އެކްލަބަށް ލިބެންޖޭހެނެ ކަމަށް ގަބޫލްކުރާ އަދަބު ތަކާއި ގުޅޭގޮތުން ވާހަކަ ދައްކާފައިވެއެވެ. ނަމަވެސް މިއީ މިކަމާއި ގުޅިގެން ޕްރިމިއަރ ލިގުން ރަސްމީކޮށް ބަހެއް ބުނި ފުރަތަމަ ފަހަރެވެ.
މިނިވަން ކޮމިޝަނުން ބެލިބެލުންތަކަށްފަހު ސިޓީއިން ޕްރިމިއަރ ލީގުގެ ގަވައިދުތަކުގެ މައި ހަތަރު ދާއިރާއަކުން 100 އަށް ވުރެ ގިނަ ފަހަރު ހިލާފުވެފައިވެއެވެ. އަދި މިކޮމިޝަނުން ބެލިބެލުމުން ސާބިތު ނުވާ ހަމައެކަނި ދައުވާއަކީ ޕްރިމިއަރ ލީގަށް އެއްބާރުލުން ނުދިނުމާއި ގުޅޭގޮތުން އުފުލި ދައުވާތަކުގެ ތެރެއިން ދައުވާއެކެވެ. ސިޓީއިން 2011-2012، 2013-2014 އަދި 2017 -2018 ވަނަ ސީޒަންގައި ލީގު ކާމިޔާބު ކުރިއިރު ސްޕޮަންސަރގެ ގޮތުގައި 360 މިލިއަން ޕައުންޑް ލިބިފައިވާކަމަށް ދައްކާފައިވީ ނަމަވެސް މިހާރު ބުނެވޭގޮތުގައި އޭގެ ތެރެއިން ސްޕޮންސަރުންގެ ފަރާތުން އަސްލު ލިބިފައިވަނީ 43 މިލިއަން ޕައުންޑެވެ. ބާކީ ބައި އައިސްފައިވަނީ ކްލަބްގެ އޯނަރުގެ ފަރާތުންނެވެ. އަދި ކޮންޓްރެކްޓް ތަކުގައި އެފައިސާވަނީ ސްޕޮންސަރުންގެ ފަރާތުން ލިބުނު އެއްޗެއްގެގޮތުގައި ދައްކާފައެވެ.
ކިޔުންތެރިންގެ ހިޔާލު