ޑްރަގުގެ ފަރުވާއަށް އޮތް އެންމެ ބޮޑު އެއް ގޮންޖެހުމަކީ ތަނުގެ ޖާގައިގެ ދަތިކަން ކަމަށާއި، ނަމަވެސް އަލަށް އިމާރާތް ކުރެވޭ ޑްރަގް ރިހެބިލިޓޭޝަން ސެންޓަރާއެކު އެ މައްސަލައަށް ދާއިމީ ހައްލެއް ލިބިގެންދާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ސްޓޭޓް މިނިސްޓަރ އަދި ނޭޝަނަލް ޑްރަގް އޭޖެންސީ (އެންޑީއޭ) ގެ ބޯޑުގެ ޗެއާޕާސަން އަލްއުސްތާޛު އަޙްމަދު ޞިއްދީޤު ވިދާޅުވެއްޖެއެވެ.
ސްޓޭޓް މިނިސްޓަރ ޞިއްދީޤު މިފަދައިން ވިދާޅުވީ، ކ. ހިންމަފުށީގައި ތަރައްގީކުރާ ޑްރަގް ޓްރީޓްމެންޓް އެންޑް ރިހެބިލިޓޭޝަން ސެންޓަރުގެ އައު އިމާރާތުގެ ބިންގާ އެޅުމަށް މި މަހުގެ 24 ވަނަ ދުވަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
އެ ރަސްމިއްޔާތުގައި ވާހަކަދައްކަވަމުން ޞިއްދީޤު ވިދާޅުވީ، ޑްރަގުގެ ފަރުވާ ބޭނުންވާ ފަރާތްތަކަށް އެކަށީގެންވާ ރަނގަޅު ފަރުވާ ފޯރުކޮށްދިނުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ގިނަގުނަ މަސައްކަތްތަކެއް ކުރައްވަމުން ގެންދަވާ ކަމަށެވެ. އަދި ބިންގާ އެޅިގެންދިޔަ އައު އިމާރާތުގެ މަސައްކަތް ނިމުމާއެކު، ފަރުވާ ބޭނުންވާ މީހުންނަށް އެންމެ އެކަށީގެންވާ ފުރިހަމަ ފަރުވާ ފޯރުކޮށްދެވޭނެ ކަމުގެ ޔަޤީންކަން ދެއްވިއެވެ.
“މި އިމާރާތް ނިމުމާއެކު ރައްޔިތުންނަށް އިހުސާސް ކުރެވޭނެ މި ސަރުކާރުން ރައްޔިތުންނަށް މަސައްކަތްތަކެއް ކޮށްދީފިކަން. ސަރުކާރުން އަމަލީ ގޮތުން މަސައްކަތް ކޮށްގެން ރައްޔިތުންނަށް އިހުސާސްވާ ކަންތައްތަކެއް ކޮށްގެން ނަތީޖާ ނެރެވޭކަން ފެންނާނެ” ސްޓޭޓް މިނިސްޓަރ ޞިއްދީޤު ވިދާޅުވިއެވެ.
މީގެއިތުރުން، މަސްތުވާތަކެތީގެ ވަބާއިން ގައުމު ސަލާމަތްކޮށް، މި މައްސަލައަށް ދާއިމީ ހައްލެއް ހޯއްދަވައިދެއްވުމަށްޓަކައި ދާޚިލީ ވަޒީރު ކުރައްވާ ބުރަ މަސައްކަތްޕުޅުތައް ފާހަގަކުރައްވަމުން ޞިއްދީޤު ވިދާޅުވީ، ހިންމަފުށީގައި އަލަށް ގާއިމްކުރާ މި ސެންޓަރުގެ މަސައްކަތް ފެށިގެން އައީ ގިނަ ގޮންޖެހުންތަކަކާ އެކުގައި ކަމަށެވެ.
އެއްފަހަރާ 500 މީހުންނަށް ފަރުވާ ދެވޭ ފެންވަރަށް ތަރައްގީކުރާ މި މަޝްރޫއަކީ ފަސް މިލިއަން ޑޮލަރުގެ އަގުހުރި މަޝްރޫޢެކެވެ. މި މަޝްރޫޢުގެ މުޅި ޚަރަދު ހަމަޖައްސަނީ އެންކޯ ހޯލްޑިންގ ޕްރައިވެޓް ލިމިޓެޑުންނެވެ. މި އައު އިމާރާތުގެ ބޮޑުބައި އެޅުމަށް ހަމަޖެހިފައިވަނީ ހިންމަފުށީގައި މިހާރު ވެސް ހިންގަމުންދާ ރިހެބިލިޓޭޝަން ސެންޓަރު ހުރި ސަރަހައްދުގެ ހުސް ބިމުގައެވެ.
އަލަށް އިމާރާތްކުރެވޭ މި ޒަމާނީ ސެންޓަރުގައި ހިންމަފުށީގެ ރައްޔިތުންނަށް ވެސް ހިދުމަތް ލިބޭނެ ފަދަ ހެލްތު ފެސިލިޓީއަކާއި، ހުނަރު ތަރައްގީ ކުރުމަށް ހާއްސަ ސްކިލް ޑިވެލޮޕްމެންޓް ބަޔަކާއި އަދި ކައުންސިލިންގގެ ހިދުމަތްތައް ގާއިމުކުރެވިގެން ދާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މައުލޫމާތުދީފައިވެއެވެ.
ހިންމަފުށީގައި މިހާރު ހުރި ރިހެބިލިޓޭޝަން ސެންޓަރަކީ 174 މީހުންގެ ޖާގައިގެ ތަނެކެވެ. ނަމަވެސް، އިމާރާތް ބާވެ ހަލާކުވުމުގެ ސަބަބުން މިހާރު އެތަނުގައި ފަރުވާ ދެވެމުން ދަނީ ގާތްގަނޑަކަށް 80 އެއްހާ މީހުންނަށެވެ. އެހެންކަމުން އަލަށް ތަރައްގީކުރާ މި ސެންޓަރާއެކު ރާއްޖޭގައި މަސްތުވާތަކެއްޗަށް ފަރުވާ ހޯދުމަށް އޮތް ޖާގައިގެ ދަތިކަމަށް ވަރަށް ބޮޑު ލުޔެއް ލިބިގެންދާނެ ކަމަށް ސަރުކާރުން ގަބޫލުކުރެއެވެ.
ކިޔުންތެރިންގެ ހިޔާލު