ބޭންކް އޮފް މޯލްޑިވްސްއާއި އެ ބޭންކުގެ ސަބްސިޑަރީ އެސްއެމްއީ ޑިޖިޓަލްއިން ޒުވާން ވިޔަފާރިވެރިންނަށް ހާއްސަކޮށްގެން ތައާރަފުކުރި ލޯނު ސްކީމުގެ ދަށުން 3،000 އަށްވުރެ ގިނަ ޒުވާނުންނަށް 300 މިލިއަން ރުފިޔާއަށްވުރެ އިތުރު އަދަދެއްގެ ލޯނު ދޫކޮށްފިއެވެ.
ބީއެމްެއެލްއާއި އެސްއެމްއީ ޑިޖިޓަލްއިން ނެރުނު ބަޔާނެއްގައި ވަނީ”ޔޫތު އޮންޓްރަޕްރިނިއަރޝިޕް ފައިނޭންސިންގ”ގެ ނަމުގައި ތައާރަފުކުރި ސްކީމަކީ އުމުރުން 18 އަހަރާއި 30 އަހަރާ ދެމެދުގެ ޒުވާނުންނަށް ހާއްސަކޮށްގެން ވިޔަފާރި ފެށުމަށާއި ވިޔަފާރިތައް ކުރިއެރުވުމަށް ފަރުމާކޮށްފައވާ ލޯނު ސްކީމެކެވެ.
މި އިސްނެގުމަށް ޒުވާނުންގެ ފަރާތުން މިފަދަ ބޮޑު ތަރުހީބެއް ލިބުނުކަމީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. އަމިއްލަ މަސައްކަތްތެރިކަމުގެ ދާއިރާއަށް ނުކުންނަން ބޭނުންވާ ޒުވާނުން އެމީހުންގެ އުފެއްދުންތެރި ހިޔާލުތައް ފައިދާހުރި ވިޔަފާރިތަކަކަށް ބަދަލުކުރުމުގައާއި، ދެމެހެއްޓެނިވި ވިޔަފާރިތަކެއް ބިނާކޮށް ދިގުމުއްދަތުގެ ކާމިޔާބީ ހާސިލުކުރުމަށް ބޭނުންވާ ހުނަރާއި ގާބިލުކަން ތަރައްގީކުރުމުގައި މާލީ އެހީތެރިކަން ފޯރުކޮށްދިނުމަކީ އަޅުގަނޑުމެންނަށް ލިބޭ ފަޚްރެއްވެސްމެ.
Advertisement
ބީއެމްއެލްގެ ސީއީއޯ މުހައްމަދު ޝަރީފު ވިދާޅުވިއެވެ.
“ޔޫތު އޮންޓްރަޕްރިނިއަރޝިޕް ފައިނޭންސިންގ” ސްކީމާ ގުޅޭ ގޮތުން އެސްއެމްއީ ޑިޖިޓަލްގެ ސީއީއޯ ބަދްރުއްދީން ހަސަން ވިދާޅުވީ އެ ސްކީމަށް ޒުވާނުންގެ ފަރާތުން ވަރަށް ބޮޑު ތަރުހީބެއް ލިބުނުކަމަށާއި، ފުރަތަމަ ފިޔަވަހީގައި 3،000 އަށްވުރެ ގިނަ ޒުވާން ވިޔަފާރިވެރިންނަށް 300 މިލިއަން ރުފިޔާގެ ލޯނު ދޫކުރެވުމަކީ ލިބުނު ކާމިޔާބެއް ކަމަށެވެ. އަދި އުންމީދަކީ ދެން އޮތް ފިޔަވަހީގައި ފޯރުކޮށްދޭ އެހީތެރިކަން އިތުރުކުރުން ކަމަށްވެސް އޭނާ ވިދާޅުވިއެވެ.
މި ސްކީމުގެ ދަށުން ލޯނު ލިބޭ ޒުވާން ވިޔަފާރިވެރިންނަށް އެހީތެރިކަން ފޯރުކޮށްދިނުމުގެ ގޮތުން އެސްއެމްއީ ޑިޖިޓަލްއާައި ބިޒްނަސް ސެންޓަރ ކޯޕަރޭޝަން ގުޅިގެން މެންޓާޝިޕާއި، ވިޔަފާރީގެ ތަމްރީނާއި ވިޔަފާރި ފޯމަލައިޒްކުރުމަށް ބޭނުންވާ ފަންނީ އެހީތެރިކަން ފޯރުކޮށްދިނުމަށް އެއްބަސްވެފައެވެ.
ޔޫތު އޮންޓްރަޕްރިނިއަރޝިޕް ފައިނޭންސިންގ ކުރިއަށް ގެންދިއުމަށް ހަމަޖެހިފައިވަނީ ކަނޑައަޅާފައިވާ ފަންޑެއްގެ ދަށުން އެކި ފިޔަވަހިތަކަށް ބަހާލައިގެންނެވެ. މި ޕްރޮގްރާމްގެ ދެވަނަ ފިޔަވައްސަށް އެޕްލިކޭޝަން ހުށަހެޅުމަށް 1 ނޮވެންބަރު 2026 ވަނަ ދުވަހު ހުޅުވައިލެވޭނެއެވެ. މިއީ ދިވެހި ޒުވާނުންނަށް މާލީ އެހީތެރިކަން ހޯދުމަށާއި ވިޔަފާރީގެ ދާއިރާއިން ކުރިއަށް ދިއުމަށް އިތުރު ފުރުސަތުތަކެއް ފަހިވެގެންދާނެ ޕްރޮގްރާމެއްކަމަށް ބީއެމްއެލްއާއި އެސްއެމްއީ ޑިޖިޓަލްއިން ބުނެއެވެ.
ކިޔުންތެރިންގެ ހިޔާލު