ސަރުކާރުގެ “ބޯހިޔާވަހިކަން އެންމެންނަށް” ސިޔާސަތުގެ ދަށުން ހުށަހަޅާފައިވާ އެޕްލިކޭޝަންތަކުގެ ޑަބަލް ވެރިފިކޭޝަން ހެދުމުގެ މަސައްކަތް މިހާރު ކުރަމުން އަންނަ ކަމަށް ބިނާރާއި ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާއިން އިއުލާނުކޮށްފިއެވެ.
އެ ވުޒާރާއިން މައުލޫމާތު ދިން ގޮތުގައި އެޕްލިކޭޝަންތަކުގެ ޑަބަލް ވެރިފިކޭޝަން މަސައްކަތް ކުރިއަށްދާއިރު އެއްވެސް މައުލޫމާތެއްގެ ފުށުއެރުމެއް އުޅޭނަމަ އެކަން އެޕްލިކެންޓަށް އަންގާނެއެވެ. އަދި ޕޯޓަލް މެދުވެރިކޮށް އެ މައުލޫމާތެއް ސާފުކޮށްދިނުމުގެ ފުރުސަތު އެ ފަރާތްތަކަށް ލިބިގެންދާނެ ކަމަށްވެސް އެ ވުޒާރާއިން ބުންޏެވެ.
މި ސިޔާސަތުގެ ދަށުން ކުރިއަށްގެންދާ ޕްރޮގްރާމްތަކާ ގުޅޭގޮތުން އާންމުންނަށް މައުލޫމާތު ފޯރުކޮށްދިނުމަށްޓަކައި އެ ވުޒާރާއިން މިހާރު ވަނީ ހާއްސަ ހެލްޕް ޑެސްކަކާއި ކޯލް ސެންޓަރެއްވެސް ގާއިމުކޮށްފައެވެ. އެގޮތުން ކޯލް ސެންޓަރުގެ ނަންބަރު ސަރުކާރު ބަންދު ނޫން ކޮންމެ ދުވަހެއްގެ ހެނދުނު ނުވައަކުން މެންދުރުފަހު ތިނަކަށް ހިދުމަތް ދެމުންދާނެއެވެ.
ސަރުކާރުން ހުޅުވާލި މި ބޯހިޔާވަހިކަމުގެ މަޝްރޫއަށް ޖުމްލަ ފަންސާސް އަށް ހާސް ފައްސަތޭކަ އަށްޑިހަ ފަސް ފޯމު ހުށަހަޅާފައިވެއެވެ. އޭގެ ތެރޭގައި ހިމެނެނީ ފްލެޓަށް އެދި ހުށަހަޅާފައިވާ ތިރީސް ފަސް ހާސް ނުވަސަތޭކަ ތިރީސް ފޯމާއި، ގޯއްޗަށް އެދި ހުށަހަޅާފައިވާ ބާވީސް ހާސް ފައްސަތޭކަ ހަތްދިހަ ފަސް ފޯމެވެ.
ދިވެހިރާއްޖޭގައި ބޯހިޔާވަހިކަމަށް ބޭނުންޖެހިފައިވާ ހުރިހާ ރައްޔިތުންނަށް މި ދައުރުގެ ތެރޭގައި ގެދޮރުވެރިކަން ކަށަވަރުކޮށްދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މުހިންމު ރިޔާސީ ވައުދުފުޅެކެވެ. އަދި މި މަޝްރޫއުގެ ދަށުން ފްލެޓާއި ގޯތި ލިބޭ ފަރާތްތަކުގެ ދާއިމީ ލިސްޓު މި އަހަރުގެ ޑިސެމްބަރު މަހުގެ ތެރޭގައި އާންމުކުރައްވާނެ ކަމަށް ރައީސުލްޖުމްހޫރިއްޔާ ވަނީ އިއުލާނު ކުރައްވާފައެވެ.
ކިޔުންތެރިންގެ ހިޔާލު