ސ. ފޭދޫ ސްކޫލުގައި ކުރިއަށްދިޔަ ކެޑޭޓް ކޭމްޕެއްގެ ތެރެއިން ހޮޑުލުމާއި ބޭރަށްހިންގުމުގެ އަލާމާތްތައް ފެނިގެން 31 ދަރިވަރަކަށް ސިއްހީ މަރުކަޒުތަކާއި ހޮސްޕިޓަލުގައި އެޑްމިޓްކޮށްގެން ފަރުވާދޭން ފަށައިފިއެވެ.
އައްޑޫ އިކުއިޓޯރިއަލް ހޮސްޕިޓަލުން މައުލޫމާތު ދިން ގޮތުގައި މި ހާދިސާގައި ފޭދޫ ސިއްހީ މަރުކަޒުގައި 12 ދަރިވަރަކަށް އަދި މަރަދޫ ސިއްހީ މަރުކަޒުގައި 12 ދަރިވަރަކަށް އެޑްމިޓްކޮށްގެން ފަރުވާ ދެމުން އަންނައިރު، އައްޑޫ އިކުއިޓޯރިއަލް ހޮސްޕިޓަލަށް 7 ދަރިވަރަކު ގެންގޮސް ވަނީ ފަރުވާ ދޭން ފަށައިފައެވެ.
ސިއްހީ އެހީތެރިން ބުނި ގޮތުގައި ފަރުވާ ދެމުންދާ ދަރިވަރުންގެ ފަރާތުން ފެންނަމުންދާ މައިގަނޑު އަލާމާތްތަކަކީ ބޭރަށްހިންގުމާއި ހޮޑުލެވުމުގެ އިތުރުން ބަނޑުގައި ރިއްސުމެވެ. ނަމަވެސް އެއްވެސް ކުއްޖެއްގެ ހާލު ސީރިއަސް ނޫން ކަމަށާއި ފަރުވާ ދެމުންދާ ވަރަކަށް ކުދިންގެ ހާލަތު މަޑުމަޑުން ރަނގަޅުވަމުން އަންނަ ކަމަށް ހޮސްޕިޓަލުން މައުލޫމާތު ދެއެވެ.
މި ހާދިސާގައި ބަލިވެގެން ފަރުވާ ދެމުންދަނީ އެ ސްކޫލުގެ ގްރޭޑް 7 އަދި 8 ގެ ދަރިވަރުންތަކަކަށެވެ. މިއީ ކާބޯތަކެތީގެ ނުވަތަ އެހެން ކަމެއްގެ ސަބަބުން ދިމާވި ހާދިސާއެއް ކަމެއް އަދި ސާފުވެފައެއް ނުވެއެވެ.
މި ހިނގާ ހަފުތާގެ ހޮނިހިރު ދުވަހުން ފެށިގެން ރާއްޖޭގެ އެކި ކަންކޮޅުތަކުގެ ސްކޫލުތަކުގައި ކެޑޭޓާއި އެހެނިހެން ޔުނިފޯމް ހަރަކާތްތަކުގެ ކޭމްޕްތައް އަންނަނީ ބާއްވަމުންނެވެ.
ކިޔުންތެރިންގެ ހިޔާލު