މި އަހަރަށް ފާސްކުރި ދައުލަތުގެ ބަޖެޓުގައި ހިލޭ އެހީގެ ގޮތުގައި ލިބޭނެކަމަށް އަންދާޒާކުރި މިންވަރަށްވުރެ އިތުރަށް ހިލޭއެހީ ލިބިފައިވާކަން މާލީ ކަންކަމާއި ދައުލަތުގެ ވިޔަފާރިތަކާ ބެހޭ ވުޒާރާގެ ހިސާބުތަކުން ހާމަވެއްޖެއެވެ.
އެ ވުޒާރާއިން އާއްމުކުރި ހިސާބުތަކަށް ބަލާއިރު އޯގަސްޓ މަހުގެ 13 ވަނަ ދުވަހުގެ ނިޔަލަށް ހިލޭއެހީގެ ގޮތުގައި ލިބުނީ 460.4 މިލިއަން ރފުިޔާ ލިބިފައިވެއެވެ. ދައުލަތުގެ ބަޖެޓުގައި ޖުމްލަކޮށް 2026 ވަނަ އަހަރު ހިލޭ އެހީގެ ގޮތުގައި ލިބޭނެކަމަށް އަންދާޒާކުރީ 373.6 މިލިއަން ރުފިޔާއެވެ.
މި ހިސާބުތަކަށް ބަލާއިރު ޖަނަވަރީ އެއްވަނަ ދުވަހުން ފެށިގެން އޯގަސްޓު މަހުގެ 13 ވަނަ ދުވަހުގެ ނިޔަލަށް ހިލޭއެހީގެ ގޮތުގައި ލިބުނު އާމްދަނީއަކީ މި އަހަރަށް ލަފާކުރި ބަޖެޓުގައި މުޅި އަހަރު ހިލޭއެހީގެ ގޮތުގައި ލިބޭނެކަމަށް އަންދާޒާކުރި މިންވަރަށްވުރެ 23.2 އިންސައްތަ އިތުރު އަދަދެކެވެ.
ބަޖެޓުގައި އަންދާޒާކުރި މިންވަރަށްވުރެ ހިލޭ އެހީ އިތުރުވިއިރު ނިމުނު އަހަރު ލިބުނު ހިލޭއެހީއާ އަޅާބަލާއިރު މި އަހަރު ހިލޭއެހީގެ ގޮތުގައި ލިބުނު ފައިސާވަީ ވަރަށް ބޮޑަށް އިތުރުވެފައެވެ. ފާއިތުވި އަހަރުގެ ޖަނަވަރީން ފެށިގެން އޯގަސްޓުގެ 13 ވަނަ ދުވަހުގެ ނިޔަލަށް ހިލޭއެހީގެ ގޮތުގައި ލިބުނީ 242.1 މިލިއަން ރުފިޔާއެވެ.
މި ހިސާބުތަކަށް ބަލާއިރު މި އަހަރުގެ އެ މުއްދަތުގައި ނިމުނު އަހަރު ލިބުނު މިންވަރަށްވުރެ އިތުރަށް 218 މިލިއަން ރުފިޔާ ލިބިފައިވެއެވެ. އެއީ އަހަރުން އަހަރަށް ބަލާއިރު 90 އިންސައްތައިގެ އިތުރުވުމެކެވެ.
ހިލޭއެހީގެ ގޮތުގައި ލިބުނު ފައިސާ އިތުރުވަމުންދަނީ ރާއްޖެއާ އެކުވެރި ދައުލަތްތަކާ އޮތް ގުޅުން ރަނގަޅުކުރެވުމުގެ ސަބަބުންނެވެ. އާއްމު ގޮތެއްގައި ދައުލަތުގެ ބަޖެޓުގައި ހިލޭއެހީގެ ގޮތުގައި ލިބޭނެކަމަށް އަންދާޒާކުރާ އަދަދާ ގާތްކުރާ މިންވަރަށްވެސް ހިލޭއެހީ ނުލިބެއެވެ. ނަމަވެސް އަހަރު ނުނިމެނީސް ބަޖެޓުގެ އަންދާޒާއަށްވުރެ ލިބުނު ހިލޭއެހީ އިތުރުވުމަކީ ލިބުނު ކާމިޔާބެކެވެ.
ކިޔުންތެރިންގެ ހިޔާލު