ފާއިތުވި 2025 ވަނަ އަހަރު އެމްޓީސީސީއަށް 2.1 ބިލިއަން ރުފިޔާގެ އާމްދަނީއެއް ލިބުމާއެކު ޖުމްލަ ސާފު ފައިދާގެ ގޮތުގައި ގާތްގަނޑަކަށް 42 މިލިއަން ރުފިޔާ ލިބުނުކަން އެ ކުންފުނީގެ މާލީ ހިސާބުތަކުން ދައްކައިފިއެވެ.
އެ ކުންފުނިންވަނީ 2025 ވަނަ އަހަރުގެ ހުރިހާ ކުއާޓާއެއްގެ މާލީ ހިސާބުތައް އާއްމުކޮށްފައެވެ. އެ ހިސާބުތަކަށް ބަލާއިރު ނިމުނު އަހަރު އެމްޓީސީސީއަށް އެންމެ ބޮޑު އާމްދަނީއެއް ލިބުނީ އެ އަހަރުގެ ފަހު ކުއާޓާގައެވެ. އެ ކުއާޓާގައި ޖުމްލަ 724.4 މިލިއަން ރުފިޔާގެ އާމްދަނީއެއް ލިބުނެވެ.
2025 ވަނަ އަހަރުގެ ފުރަތަމަ ކުއާޓާގައި އެމްޓީސީސީއަށް ލިބުނީ 418.4 މިލިއަން ރުފިޔާއެވެ. އަދި ދެވަނަ ކުއާޓާގައި 490.3 މިލިއަން ރުފިޔާ އަދި ތިންވަނަ ކުއާޓާގައި 501.1 މިލިއަން ރުފިޔާއެވެ. އެހެންކަމުން ތިންވަނަ ކުއާޓާއާ އަޅާބަލާއިރު އަހަރުގެ ފަހު ކުއާޓާގައި ލިބުނު އާމްދަނީ 45 އިންސައްތަ އިތުރުވިއެވެ.
އަދި މި ހިސާބުތަކަށް ބަލާއިރު މުޅި އަހަރު އެމްޓީސީސީއަށް ޖުމްލަ 2.1 ބިލިއަން ރުފިޔާގެ އާމްދަނީއެއް ލިބުނެވެ. ނަމަވެސް 2025 ވަނަ އަހަރުގެ ފުރަތަމަ ކުއާޓާގައި އެ ކުންފުންޏަށް ފައިދާނުވެއެވެ.
ނިމުނު އަހަރުގެ ފުރަތަމަ ކުއާޓާގައި 418.4 މިލިއަން ރުފިޔާގެ އާމްދަނީއެއް ލިބުނު ނަމަަވެސް، އެ ކުއާޓާގައި 62.1 މިލިއަން ރުފިޔާއިން ގެއްލުންވިއެވެ. މައިގަނޑު ގޮތެއްގައި ގެއްލުންވީ ކުންފުނީގެ އެކި ހަރަދުތައް ބޮޑުވުމުގެ ސަބަބުންނެވެ.
ޖެހިގެންއައި ތިން ކުއާޓާގައި ކުންފުނީގެހަރަދުތައް ކުޑަކުރުމާއެކު އާމްދަނީ އިތުރުކުރުމުގެ ސަބަބުން ދެވަނަ ކުއާޓާގައި 27.9 މިލިއަން ރުފިޔާ އަދި ދެވަނަ ކުއާޓާގައި 13.3 މިލިއަން ރުފިޔާ އަދި ފަހު ކުއާޓާގައި 62.8 މިލިއަން ރުފިޔާއިން ފައިދާވިއެވެ. އެ ކުންފުންޏަށް މި ތިން ކުއާޓާގައި ލިބުނު ފައިދާއިން ފުރަތަމަ ކުއާޓާގެ ގެއްލުން އުނިކުރުމުން މުޅި އަހަރު 42.03 މިލިއަން ރުފިޔާގެ ސާފު ފައިދާއެއް ލިބޭނެއެވެ.
މި ތިން ކުއާޓާގައި ވިޔަފާރީގެ ފައިދާގެ ޓެކުހުގެ ގޮތުގައި އެ ކުންފުނިން ދައުލަތަށް ދައްކަންޖެހޭ ފައިސާއަށް ބަލާއިރު، ދެވަނަ ކުއާޓާގައި 4.9 މިލިއަން ރުފިޔާ އަދި ތިންވަނަ ކުއާޓާގައި 2.3 މިލިއަން ރުފިޔާ އަދި ފަހު ކުއާޓާގައި 6.2 މިލިއަން ރުފިޔާއާއެކު ޖުމްލަ 14 މިލިއަން ރުފިޔާ ގާތްކުރާ އަދަދެއް ޓެކުހުގެ ގޮތުގައި ދައްކަަންޖެހެއެވެ.
2025 ވަނަ އަހަރުގެ ހަތަރުވަނަ ކުއާޓާގައި އެމްޓީސީސީއަށް ލިބުނު އާމްދަނީގެ ތެރެއިން އެންމެ ބޮޑު އާމްދަނީއެއް ލިބުނީ އިމާރާތްކުރުމާއި ބިން ހިއްކުމުގެ ދާއިރާއިންނެވެ. އެ ދާއިރާއިން 589.4 މިލިއަން ރުފިޔާ އަދި ދަތުރުފަތުރުގެ ދާއިރާއިން 38.3 މިލިއަން ރުފިޔާ އަދި ގަނެވިއްކުމުގެ ވިޔަފާރިތަކުން 92.07 މިލިއަން ރުފިޔާ އަދި އެހެނިހެން ގޮތްގޮތުން 4.6 މިލިއަން ރުފިޔާ ލިބިފައިވެއެވެ.
ކިޔުންތެރިންގެ ހިޔާލު