މަސްވެރިކަމުގެ ސިނާޢަތާ ގުޅުންހުރި މުހިންމު މަޝްރޫޢުތަކުގެ މަސައްކަތްތައް ހަލުވި ދުވެއްޔެއްގައި ކުރިއަށް ގެންދިއުމާ ގުޅޭގޮތުން، މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމާއި، އެމްޓީސީސީގެ ސީއީއޯ ޑީސީޕީ (ރިޓަޔާރޑް) އަޙްމަދު ސަޢުދީ އަދި މިފްކޯގެ ސީއީއޯ މުޙައްމަދު އަނަސް ބައްދަލުކުރައްވައި މަޝްވަރާކުރައްވައިފިއެވެ.
މި ބައްދަލުވުމުގެ އެންމެ މުހިންމު ބޭނުމަކީ، ސަރުކާރުން މަސްވެރިންނަށް ފަހި ގޮތްތަކެއް ހޯދައިދިނުމަށްޓަކައި މިހާރު ފަށާފައިވާ ތަރައްޤީގެ ބޮޑެތި މަޝްރޫޢުތައް ނިންމުމަށް ހުރި ހުރަސްތައް ދެނެގަނެ އެކަންކަން ޙައްލުކުރުމެވެ. އެގޮތުން ކަމާގުޅޭ މުއައްސަސާތައް ގުޅިގެން މަސައްކަތްތައް ކުރިއަށްދާ ގޮތް ބައްލަވައި، އެކަންކަން އިތުރަށް އަވަސްކުރުމަށް ކުރެވެންހުރި ކަންކަމާމެދު ވަނީ ފުޅާ ދާއިރާއެއްގައި ޚިޔާލު ބަދަލުކުރައްވާފައެވެ.
މިގޮތުން، ގާފުދާލު ތިނަދޫގައި ތަރައްޤީކުރާ ކޯލްޑް ސްޓޯރޭޖާއި އެރަށު ބަނދަރުގެ މަސައްކަތްތަކުގެ އިތުރުން ހާއަލިފު އިހަވަންދޫ ކޯލްޑް ސްޓޯރޭޖްގެ ބަނދަރު ހެދުމުގެ މަސައްކަތް އަވަސްކުރުމަށް މި ބައްދަލުވުމުގައި ޚާއްޞަ އިސްކަމެއް ދެއްވައިގެން ވާހަކަދެކެވުނެވެ. މީގެ އިތުރުން ގާފުއަލިފު ކޫއްޑޫ އަދި ސީނު ހުޅުމީދޫގައި ހުންނަ އައްޑޫ ފިޝަރީޒް ކޮމްޕްލެކްސްގެ ބަނދަރުގެ މަސައްކަތްތައް މިހާރަށްވުރެ ހަލުވިކޮށް ކުރިއަށް ގެންދިއުމަށްޓަކައި އެމްޓީސީސީއާއި މިފްކޯ ގުޅިގެން އެޅިދާނެ ފިޔަވަޅުތަކާ ގުޅޭގޮތުންވެސް ވަނީ މަޝްވަރާކުރައްވާފައެވެ.
މަސްވެރިކަމުގެ ސިނާޢަތަށް ބޭނުންވާ ޢުމްރާނީ ތަރައްޤީގެ ގިނަ މަސައްކަތްތަކެއް ސަރުކާރުގެ ކުންފުނިތައް މެދުވެރިކޮށް މިހާރުވެސް ދަނީ ކުރިއަށެވެ. މި މަޝްރޫޢުތައް ނިމުމުން، މަސްވެރިން ބާނާ މަސް ކިރުމުގައާއި ރައްކާތެރިކަމާއެކު ގިނަ ދުވަހު މަސް ގަނޑުކޮށްފައި ބެހެއްޓުމަށް މިހާރު ދިމާވަމުންދާ ދަތިތަކަށް ދާއިމީ ޙައްލެއް ލިބިގެންދާނެކަމަށް ކަމާބެހޭ ފަރާތްތަކުން އުންމީދުކުރެއެވެ.
ކިޔުންތެރިންގެ ހިޔާލު