މުހިންމު މަސައްކަތްތަކެއް ނިންމަން ހުރުމުން ވިހިވަނަ ރައްޔިތުންގެ މަޖިލީހުގެ މި އަހަރުގެ ދެވަނަ ދައުރު ދަންމައިލަން ހުށަހަޅައިފިއެވެ.
ރައްޔިތުންގެ މަޖިލީހުގެ ގަވާއިދުގައިވާ ގޮތުން ރައްޔިތުންގެ މަޖިލީހުގެ މި ހިނގާ ދެވަނަ ދައުރު ހިނގާނީ ޖޫން މަހުން ފެށިގެން އަންނަ ހޮނިހިރު ދުވަހުގެ ނިޔަލަށެވެ. ދައުރުގެ ފަހު ޖަލްސާ ބާއްވަން ޖެހޭނީ ދައުރުގެ އެންމެ ފަހު ބުރާސްފަތި ނުވަތަ ހޯމަ ދުވަހެވެ. އެހެންކަމުން މި ހިނގާ ދެވަނަ ދައުރުގެ ފަހު ޖަލްސާ އޮންނާނީ މާދަމާއެވެ.
ނަމަވެސް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله މިއަދު ހުށަހެޅުއްވީ މި މަހުގެ 20 ވާ ބުރާސްފަތި ދުވަހުގެ ނިޔަލަށް ދައުރު ދަންމާލުމަށެވެ.
މަޖިލީހުގައި ކުރަން ހުރި މުހިންމު މަސައްކަތްތަކަށް ސަރުކާރުން ކުރިއަށްގެންދާ ތަރައްގީގެ މަޝްރޫއުތައް ހިންގަން ބޭނުންވާ ބިން ކަައުންސިިލްގެ އިހުތިސާސުން ވަކިކުރުމުގެ ބާރު ވަޒީރުންގެ މަޖިލީހަށް ލިބޭގޮތަށް ލާމަރުކަޒީ ގާނޫނަށް ހުށަހެޅި އިސްލާހުގެ މަސައްކަތް ފާހަގަކޮށްލެވެއެވެ. އެ ބިލު ފާސްކުރުމުގެ މަސައްކަތް ފަސް ދުވަހުން ނިންމަން ލާމަރުކަޒީ ކޮމިޓީން ވެސް ވަނީ ނިންމައިފައެވެ. މީގެ އިތުރަށް އިގްތިސާދީ ވަޒީރު މުހައްމަދު ސައީދުގެ މައްޗަށް އިތުބާރު ނެތް ކަމަށް ހުށަހެޅި މައްސަލަ ވެސް އަންނަ ހަފުތާގައި ގެންދާނެ ކަމަށް ބެލެވެއެވެ.
ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރު ވެސް މުހިންމު މަސައްކަތްތަކެއް ހުރުމުން ވަނީ ދަންމާލާފައެވެ.
ކިޔުންތެރިންގެ ހިޔާލު