މިއަހަރު ނިމުމުގެ ކުރިން ހުޅުމާލޭގައި ޓިނުން ހަދާފައިވާ ވަގުތީ މިސްކިތްތައް އުވާލައި އެ ސަރަހައްދުތަކުގައި ދާއިމީ މިސްކިތްތައް ބިނާކޮށް ނިމޭނެކަމަށް އިސްލާމީ ކަންތައްތަކާއި އައުޤާފަ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މަނަދޫ ދާއިރާގެ މެމްބަރު ހުސްނީ މުބާރިކް ކުރެއްވި ސުވާލަކަށް ދެއްވި ޖަވާބުގައި ވަޒީރު ވިދާޅުވީ މިހާރުވެސް ރާއްޖޭގެ އެކި ކަންކޮޅުތަަކުގައި އިސްލާމީ ދާއިރާގެ 81 މަޝްރޫއަށް ވުރެ ގިނަ މަޝްރޫއު ފެށިގެން ކުރިއަށްދާކަމަށެވެ.
މިދިޔަ ރޯދަމަހަށް ގިނަ އަދަދެއްގެ މިސްކިތް ހުޅުވާފައިވާކަން ފާހަގަކުރައްވައި ވަޒީރު ވަނީ މިއަހަރުގެ ރޯދަ މަހުގެ ކުރިން ވެސް ވިއްސަކަށް މިސްކިތް ހުޅުވިގެންދާނެކަމަށެވެ.
“އިރާދަކުރެއްވިއްޔާ މި އަހަރުގެ ރޯދަމަހުގެ ކުރިން އިތުރު ވިއްސަކަށް މިސްކިތް ހުޅުވިގެންދާނެ، މާލޭ އޭރިއާގައި ހުރި ވަގުތީ މިސްކިތްތައް، ހުޅުމާލޭގައި ހުރި ޓިނުން ހަދާފައިވާ މިސްކިތްތައް އުވާލެވޭނެ، އަހަރު ނިމުމުގެ ކުރިން ހުޅުމާލޭގެ ހުރިހާ ސަރަހައްދެއްގައި ދާއިމީ މިސްކިތްތައް ބިނާކުރެވިގެންދާނެ،” ވަޒީރު
ފާއިތުވީ ދެ އަހަރުގެ ތެރޭގައި އިސްލާމީ ދާއިރާއިން ގިނަ މަޝްރޫއުތަކެއް ފަށާފައިވާކަމަށް ވަޒީރު ވިދާޅުވިއެވެ.
“އިސްލާމީ ކަންތައްތަކާ ބެހޭ ވުރާޒާއިން މިހާރު ކުރިއަށް އެބަގެންދޭ 81 މަޝްރޫއަށް ވުރެ ގިނަ މަޝްރޫއުގެ މަސައްކަތް، އޭގެތެރޭގައި މިސްކިތްތަކާއި، އިސްލާމީ މަރުކަޒުތަކާއި ވަގުފު ބިނާތައް ހިމެނޭ، އަޅުގަނޑު ދަންނަވާނީ މިއީ ކުރު މުއްދަތެއްގެ ތެރޭގައި ރާއްޖޭގެ ތާރީހުގައި އިސްލާމީ ދާއިރާގެ އެންމެ ގިނަ މަޝްރޫއުތައް ތަންފީޒުކުރެވެމުންދާ މުއްދަތޭ މިއީ،” ވަޒީރު
މި މަޝްރޫއުތައް ކުރިއަށްގެންދަނީ މެދުއިރުމަތީގެ ހަނގުރާމައިގެ ސަބަބުން ދިމާވެފައިވާ ދަތިތަކާއި އިގްތިސާދީ ދަތިތަކުގެ ތެރެއިންކަމަށް ވަޒީރު ވިދާޅުވިއެވެ.
މިދިޔަ ރޯދަ މަހުގެ ކުރިންނާއި ރޯދަ މަހުގެ ތެރޭގައި ވިއްސަކަށް މިސްކިތުގެ އަމަލީ މަސައްކަތް ނިންމައި ހުޅުވާފައިވާކަމަށް ވިދާޅުވެ ވަޒީރު ވަނީ ގޮންޖެހުންތަކާ އެކުވެސް މަސައްކަތްތައް ނިންމާނެކަމުގެ ޔަގީންކަން ދެއްވާފައެވެ.
“އޭގެ ތެރޭގައި ކުރީ ސަރުކާރުން ފަށައި ނުނިންމާ ހުރި މަޝްރޫއުތައްވެސް އެބަހުރި، އަދި ބޮޑެތި މަޝްރޫއުތައް ވެސް ހިމެނޭ، މިސާލަކަށް ދިއްދޫ އިސްލާމީ މަރުކަޒުގެ މަސައްކަތް، އެ މަޝްރޫއު ފަށާފައި އޮތީ އެންމެ ދެ ލައްކަ ރުފިޔާ ބަޖެޓުގައި ޖަހައިގެން، އެކަމަކު އެތަނަށް ފަސްދޮޅަހެއްހައި މިލިއަން ރުފިޔާ ހަރަދުކުރެވިފައިވަނީ، މިއީ ފެނިފައި ހުރި ހަގީގަތްތައް،” ވަޒީރު
ވަޒީރު ވިދާޅުވީ ސަރުކާރުގެ އަމާޒަކީ ކުރީ ސަރުކާރުން ވިޔަސް ފަށާފައިހުރި ރަނގަޅު، ރައްޔިތުންނަށް ފައިދާވާ މަޝްރޫއުތައް ނިންމުންކަމަށެވެ.
ވަޒީރު ވަނީ މި މަޝްރޫއުތައް ކުރިއަށް ގެންދިއުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ޕީއެންސީގެ މަޖިލިސް މެމްބަރުން ދެއްވާ އެއްބާރުލުން ފާހަގަކުރައްވައި އެކަމަށް ޝުކުރު އަދާކުރައްވާފައެވެ.
ހިޔާ ސަރަހައްދުގައި ދިރިއުޅޭ އިސްރަށްވެހިންނާއި ހާއްސަ އެހީ އަށް ބޭނުންވާ މީހުންނަށް މިސްކިތަށް ދިއުމަށް ދުރު ސަރަހައްދަކަށް ދާންޖެހުމުން ދިމާވާ ދަތިތަކަށް ހައްލެއް ގެނައުމުގެ ބޭނުމުގައި ހުޅުމާލޭގެ އެކި ސަރަހައްދުތަކުގައި ވަގުތީ މިސްކިތްތައް ވަނީ ބިނާކޮށްފައެވެ.
ކިޔުންތެރިންގެ ހިޔާލު