ރާއްޖޭގެ ‘ފަވަރަ’ އާއި އިންޑިއާގެ ‘ޔޫޕީއައި’ ގުޅާލައި، ކިއުއާރު ކޯޑު މެދުވެރިކޮށް ވިޔަފާރިތަކަށް ސީދާ ފައިސާ ދެއްކޭނެ ނިޒާމެއް ތަރައްޤީކުރުމުގެ މަސައްކަތް ފަށާފައިވާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޑެޕިއުޓީ ގަވަރުނަރު އައިޝަތު އަސްނާ ހަމްދީ ވިދާޅުވެއްޖެއެވެ.
ބީއެމްއެލް އަދި އެމްއައިބީ މެދުވެރިކޮށް އިފްތިތާޙުކުރެވުނު މި ޚިދުމަތުގެ ފުރަތަމަ ފިޔަވަހީގެ ދަށުން، މިހާރު ވަނީ ރާއްޖެއިން އިންޑިއާއަށް ކުޑަ ވަގުތުކޮޅެއްގެ ތެރޭގައި އަމިއްލަ ފަރުދުންގެ މެދުގައި ފައިސާ ފޮނުވޭނެ އިންތިޒާމު ހަމަޖެހިފައެވެ. އެގޮތުން ތަޢުލީމީ، ބޭސްފަރުވާ އަދި އާއިލީ ޚަރަދުތަކަށް މަހަކު ގިނަވެގެން 24,000 އިންޑިއާ ރުޕީސް (ގާތްގަނޑަކަށް 250 ޑޮލަރު) ފޮނުވޭނެއެވެ.
އަސްނާ ފާހަގަކުރެއްވި ގޮތުގައި ކުރިއަށްއޮތްތަނުގައި ދެ ގައުމުގެ ރައްޔިތުންނަށްވެސް އެ ގައުމެއްގެ އަމިއްލަ އެޕްތައް މެދުވެރިކޮށް ސީދާ ފައިސާ ދެއްކޭނެ ގޮތަށް ކިއު.އާރް ބޭސްޑް މާރޗަންޓް ޕޭމަންޓްސްއަށް މި ނިޒާމު ފުޅާކުރެވޭނެއެވެ.
އަދި އިންޑިއާއިން ރާއްޖެއަށް ފައިސާ ފޮނުވޭނެ ދެވަނަ މަރުހަލާގެ މަސައްކަތްތައް ކުރިއަށްދާއިރު، މި ނިޒާމު ފުރިހަމަވުމުން ދިވެހި ރުފިޔާ، ޑޮލަރު އަދި އިންޑިއަން ރޫޕީ އެކައުންޓްތަކުން ފަސޭހަކަމާއެކު ފައިސާ ފޮނުވޭނެއެވެ. މިއީ ބޭސްފަރުވާއަށާއި ތައުލީމަށް އިންޑިއާއަށް ފައިސާ ފޮނުވާ ދިވެހިންނަށާއި، ރާއްޖޭގައި މަސައްކަތްކުރާ އިންޑިއާ ރައްޔިތުންނަށް ލިބިގެންދާނެ ބޮޑު ލުޔެކެވެ.
ކިޔުންތެރިންގެ ހިޔާލު