ލާމަރުކަޒީ ނިޒާމަށް ބޮޑެތި ބަދަލުތަކެއް ގެނެސް އަތޮޅު ކައުންސިލްތައް އުވާލުމާ ގުޅިގެން، ލޯކަލް ގަވަމެންޓް އޮތޯރިޓީ (އެލްޖީއޭ) ގެ ބައްދަލުވުންތައް އާންމުކޮށް ފެންނާނެހެން ލައިވްކޮށްދިނުމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން މިއަދު އެދިއްޖެއެވެ.
އިދިކޮޅު މައި ޕާޓީގެ ލާމަރުކަޒީ ކޮމިޓީގެ ފަރާތުން މިއަދު އެލްޖީއޭއާއެކު ބޭއްވި ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައިވަނީ ދެ މައްސަލައަކާ ގުޅޭގޮތުންނެވެ. އެގޮތުން އަތޮޅު ކައުންސިލްތައް އުވާލުމުގެ މައްސަލައާއި، ހިރިމަރަދޫގައި މީހުން ދިރިއުޅެމުން ދަނިކޮށް އެ ރަށަކީ ފަޅު ރަށެއްގެ ގޮތުގައި ކަނޑައަޅައި އެ ރަށުގެ ކައުންސިލް އުވާލުމަށް ނިންމާފައިވާ ނިންމުމާމެދު އެ ޕާޓީން ވަނީ ކަންބޮޑުވުން ފާޅުކޮށްފައެވެ.
އެލްޖީއޭގެ އޮފީހުގެ ބޭރުގައި ނޫސްވެރިންނާ ވާހަކަދައްކަވަމުން، ނަވާރަވަނަ ރައްޔިތުންގެ މަޖިލީހުގެ ހުޅުމާލެ ދާއިރާގެ މެންބަރުކަން ކުރެއްވި އަލީ ނިޔާޒު ވިދާޅުވީ އެ އޮތޯރިޓީއަށް ވަރަށް ބޮޑަށް ސިޔާސީ ނުފޫޒު ފޯރާފައިވާ ކަމަށް ގަބޫލުކުރެވޭ ކަމަށެވެ. އެހެންނަމަވެސް، އެލްޖީއޭއިން އެ ތުހުމަތުތައް ދޮގުކުރާ ކަމަށްވެސް އޭނާ ފާހަގަކުރެއްވިއެވެ.
ވަރަށް އަވަހަށް އެލްޖީއޭގެ ބޯޑަށް މެންބަރުން އިންތިހާބުކުރެވިގެންދާނެކަން ފާހަގަކުރައްވައި، ނިޔާޒު ވިދާޅުވީ އެ އޮތޯރިޓީގެ ބައްދަލުވުންތައް ރައްޔިތުންނަށް ފެންނާނެހެން ލައިވްކުރުމަށް އެދުނީ ހާމަކަންބޮޑު ގޮތެއްގައި ކަންކަން ކުރިއަށް ގެންދިއުމުގެ މަގުސަދުގައި ކަމަށެވެ. މި ހުށަހެޅުމަކީ ރަނގަޅު ހިޔާލެއް ކަމަށް އެލްޖީއޭއިން ބުނެފައިވާ ކަމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ މުގައްރިރުކަންވެސް ކުރެއްވި ނިޔާޒު ވިދާޅުވި ނަމަވެސް، މިކަމާމެދު އެ އޮތޯރިޓީން އަދި ރަސްމީކޮށް ވަކި ގޮތެއް ނިންމާފައެއް ނުވެއެވެ.
ކިޔުންތެރިންގެ ހިޔާލު