މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން، ރާއްޖޭގެ އިޤުތިޞާދާއި އާބާދީގެ މަޢުލޫމާތު ފަސޭހައިން ބަލައިލެވޭނެ އިންޓަރެކްޓިވް ޑޭޓާ އެކްސްޕްލޯރާ ޕޯޓަލްއެއް މިއަދު ތަޢާރަފުކޮށްފިއެވެ. މި ޕޯޓަލް ތަޢާރަފުކޮށްފައިވަނީ ދިވެހިރާއްޖޭގެ ތަފާސްހިސާބުގެ ޤާނޫނަށް ފަސް އަހަރު ފުރުމުގެ މުނާސަބަތާ ގުޅިގެންނެވެ.
އަލަށް ތަޢާރަފުކުރެވުނު ޑޭޓާ އެކްސްޕްލޯރާ މެދުވެރިކޮށް، ކޮންސިއުމާ ޕްރައިސް އިންޑެކްސް (ސީޕީއައި) އާއި، ޤައުމީ އުފެއްދުންތެރިކަމުގެ މިންގަނޑު (ޖީޑީޕީ) ގެ އިތުރުން އާބާދީގެ ލަފާކުރުންތައް އިންޓަރެކްޓިވްކޮށް ބަލައިލެވޭނެ އިންތިޒާމު ވަނީ ހަމަޖެހިފައެވެ. މީގެ ސަބަބުން އާންމުންނަށް ރަސްމީ ތަފާސްހިސާބުތައް ހޯދުމަށް އިތުރު ލުއިފަސޭހަތަކެއް ލިބިގެންދާނެ ކަމަށް އެ އިދާރާއިން ފާހަގަކުރެއެވެ.
މި ޕްލެޓްފޯމްގެ މައިގަނޑު މަޤުޞަދަކީ ރާއްޖޭގެ އިޤުތިޞާދަށާއި އާބާދީއަށް އަންނަ ބަދަލުތަކާ ގުޅޭގޮތުން އާންމުން ހޭލުންތެރިކުރުވުން ކަމަށް އެމްބީއެސްއިން ބަޔާންކުރެއެވެ. ރައީސުލްޖުމްހޫރިއްޔާ 20 ޖުލައި 2021 ގައި ތަސްދީޤުކުރެއްވި ތަފާސްހިސާބުގެ ޤާނޫނުގެ ދަށުން، އެމްބީއެސްއަކީ ފަންނީ ގޮތުން މިނިވަން މުއައްސަސާއެއްގެ ގޮތުގައި ވަނީ ކަނޑައަޅައިފައެވެ. މީގެ ސަބަބުން ޤައުމުގައި ރަސްމީ ތަފާސްހިސާބުތައް އެއްކުރުމާއި، ބެލެހެއްޓުމުގެ އިތުރުން އާންމުންނަށް ފޯރުކޮށްދިނުމުގެ ނިޒާމު ހަރުދަނާވެފައިވާ ކަމަށް އެ އިދާރާއިން ބުނެއެވެ.
ތަފާސްހިސާބުގެ ޤާނޫނުގެ ދަށުން، އެމްބީއެސް ހިންގުމާ ހަވާލުވެހުންނަވާ ޗީފް ސްޓެޓިސްޓިޝަން އައްޔަންކުރައްވަނީ ރައީސުލްޖުމްހޫރިއްޔާއެވެ. މި ބިއުރޯގެ ކަންކަމުގައި ޖަވާބުދާރީވާ ވުޒާރާއަކީ މިނިސްޓްރީ އޮފް ފައިނޭންސް ކަމަށްވާއިރު، އެ އިދާރާ ހިންގަމުންދަނީ ފިނޭންސް މިނިސްޓަރުގެ އިރުޝާދުގެ ދަށުންނެވެ.
ކިޔުންތެރިންގެ ހިޔާލު