ރާއްޖެއިން ބޭރުގައި ދިވެހިން ކުރާ ހޭދައާ ގުޅޭ ދިރާސާއެއް ހަދަން މަރުކަޒީ ބޭންކު، އެމްއެމްއޭއިން ނިންމައިފިއެވެ.
އެމްއެމްއޭއިން ބުނީ މި ދިރާސާ ކުރުމަށް ނިންމީ ރާއްޖޭގެ ބެލެންސް އޮފް ޕޭމަންޓްސްއާ ގުޅޭ ތަފާސްހިސާބުތައް ތައްޔާރުކުރުމަށް ބޭނުންވާ މައުލޫމާތު ހޯދުމުގެ ގޮތުން ކަމަށެވެ. މި ދިރާސާއަށް މަޢުލޫމާތު އެއްކުރުމަށް ހަމަޖެހިފައިވަނީ ރާއްޖޭން ބޭރަށް ދަތުރުކުރުމަށްފަހު، އެނބުރި އަންނަ ދިވެހީންނަށް އަމާޒުކޮށްގެން ސަރވޭއެއް ހިންގާނެ ކަމަށް އެމްއެމްއޭއިން ބުންޏެވެ. އަދި މި ދިރާސާ ކުރިއަށް ގެންދިއުމަށް ހަމަޖެހިފައިވަނީ މިމަހުގެ 25 އިން 31 އަށް ވެލާނާ އިންޓަރނޭޝަނަލް އެއަރޕޯޓުގެ އެރައިވަލް ހޯލުގައިކަމަށްވެސް އެމްއެމްއޭއިން ބުންޏެވެ.
މި ދިރާސާއަށް މައިގަނޑުގޮތެއްގައި ނަގާ މައުލޫމާތުތަކުގެ ތެރޭގައި ދަތުރުގެ މައިގަނޑު މަޤުސަދުތަކާއި ދަތުރުކުރި ޤައުމާއި، ޓިކެޓުގެ ޚަރަދާއި ހުރުމުގެ ޚަރަދުގެ އިތުރުން ބޭސްފަރުވާއަށް ކުރި ޚަރަދާއި ޖުމްލަ ގޮތެއްގައި މުޅި ދަތުރަށް ކުރި ޚަރަދުގެ މައުލޫމާތު ހިމެނެއެވެ. މި މައުލޫމާތު ނެގި ނަމަވެސް ވަކިވަކި ފަރުދުންގެ ނަމާއި، އެޑްރެސް ފަދަ ޒާތީ އެއްވެސް މައުލޫމާތެއް ދިރާސާގައި އެއް ނުކުރާނެ ކަމަށްވެސް އެމްއެމްއޭއިން ބުންޏެވެ.
މި ދިރާސާގެ މުއްދަތުގައި އެމްއެމްއޭގެ މުވައްޒަފުން ވެލާނާ އިންޓަރނޭޝަނަލް އެއަރޕޯޓުގެ އެރައިވަލް ހޯލުގައި ސަރވޭއަށް ބޭނުންވާ މައުލޫމާތު އެއްކުރުމުގައި ހަރަކާތްތެރިވާނެ ކަމަށް ބުންޏެވެ. އަދި ހުރިހަ މަޢުލޫމާތެއްގެ ސިއްރު ހިފަހައްޓާނެކަމުގެ ޔަޤީންކަންވެސް އެމްއެމްއޭއިން ވަނީ ދީފައެވެ.
ކިޔުންތެރިންގެ ހިޔާލު