އެމެރިކާ ސިފައިން އީރާނަށް ރޭގައި ދިން ހަމަލާތަކުގައި ދެމީހުން މަރުވެ، 260 މީހުން ޒަޚަމްވެފައިވާ ކަމަށް އީރާނު ސަރުކާރުން ބުނެފިއެވެ.
އީރާނު ސަރުކާރުގެ މިނިސްޓްރީ އޮފް ހެލްތުގެ ތަރުޖަމާނު ވިދާޅުވީ، ޒަޚަމްވި މީހުންގެ ތެރެއިން 222 މީހަކަށް ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށެވެ. ޒަޚަމްވި މީހުންގެ ތެރޭގައި އުމުރުން 18 އަހަރުން ދަށުގެ ތިންކުދިންވެސް ހިމެނޭ ކަމަށް ބުނެފައި ވެއެވެ.
އީރާނުގެ ބަނދަރުތައް ކަނޑުމަގުން ބަންދުކުރުމަށްފަހު އެމެރިކާ ސިފައިން ގެންދަނީ އީރާނުގެ އައްސޭރިފަށުގެ އެތައް ސިޓީއަކަށާއި، އައްސޭރިފަށުގެ އެތައް ރަށަކަށްވެސް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދެމުންނެވެ.
ރެއިން ފެށިގެން އެމެރިކާ ސިފައިންވަނީ މެދުނުކެނޑި ހަތްގަޑިއިރު ވަންދެން އީރާނުގެ އެކި ތަންތަނަށް ބޮންއަޅާފައެވެ.
އެމެރިކާއަށް ދިން ހަމަލާތަކަށްފަހު އެމެރިކާގެ ސެންޓްރަލް ކޮމާންޑުން ބުނެފައިވަނީ، އެމީހުން ހަމަލާތައް ދިނީ އީރާނުގެ މިސައިލާއި ޑްރޯން ސައިޓްތަކަށާއި، އީރާނު ކަނޑުގެ ސިފައިންގެ ތަންތަނަށާއި، އައްސޭރިފަށުގެ ތަންތަނުގައި ގާއިމްކޮށްފައިވާ ދިފާއީ ނިޒާމުތަކަށް ކަމަށެވެ.
އެކަމަކު، އީރާނުން ބުނަނީ، އެމެރިކާއިން އީރާނުގެ އާންމު ތަންތަނަށްވެސް ހަމަލާތައް ދެމުންގެންދާ ކަމަށެވެ.
އެމެރިކާ ސިފައިން އީރާނާ ދެކޮޅަށް ވައިގެ ހަމަލާތައް ދޭން ފެށިފަހުން އީރާނު ސިފައިންގެ އެތައް ބަޔަކު މަރުވެ، އެތައް ބަޔަކު ޒަޚަމްވެފައިވެސް ވެއެވެ. އަދި އާންމުންވެސް މަރުވެފައިވާ ކަމަށް އީރާނުން ބުނެފައި ވެއެވެ.
ހަމަލާތައް ހުއްޓާލުމަށް އީރާނާއެކު ވެފައިވާ އެއްބަސްވުމާއި، އަދި ޕާކިސްތާނު މެދުވެރިވެގެން ހެދި އެމްއޯޔޫއާވެސް ޚިލާފްވެ އެމެރިކާއިން މިހާރު ގެންދަނީ ކަނޑުމަގުން ދަތުރުކުރާ އީރާނުގެ އުޅަނދުފަހަރު ބްލޮކް ކުރަމުންނެވެ.
ކިޔުންތެރިންގެ ހިޔާލު