ހުޅުމާލޭގެ އެކި ސަރަހައްދުތަކުން ގަވާއިދާ ޚިލާފަށް ކުނި ނަގައި އުކައިދިނުމުގެ މަސައްކަތް ކުރަމުންދިޔަ ބަންގްލަދޭޝްގެ ދެ ރައްޔިތަކު އިއްޔެ ހެނދުނު ފުލުހުންގެ ބެލުމުގެ ދަށަށް ގެނެސް، އިމިގްރޭޝަނާ ހަވާލުކޮށްފިއެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ ބަންގްލަދޭޝަށް ނިސްބަތްވާ އުމުރުން 43 އަހަރުގެ އެމްޑީ ހަބީބު އުލާހު އާއި 39 އަހަރުގެ އެމްޑީ މޮރިންއެވެ. ފުލުހުން މައުލޫމާތު ދީފައިވާ ގޮތުގައި، މި ދެ މީހުން ފުލުހުންގެ ބެލުމުގެ ދަށަށް ގެނެސްފައިވަނީ އިއްޔެ ހެނދުނު 08:45 ހާއިރުއެވެ. މި މީހުން ހިފަހައްޓާފައިވަނީ ކުނި އުފުލުމަށް ބޭނުންކުރަމުންދިޔަ ޕިކަޕަކާ އެކީގައެވެ.
ފުލުހުން ހާމަކޮށްފައިވާ ގޮތުގައި، ހައްޔަރުކުރެވުނު އެމްޑީ މޮރިންއަކީ “ގޯލްޑް ކިންގް ޕްރައިވެޓް ލިމިޓެޑް” ގެ ދަށުން މޭސަނެއްގެ ގޮތުގައި ރާއްޖޭގައި މަސައްކަތްކުރުމުގެ ވިސާ އޮންނަ މީހެކެވެ. އަދި އެމްޑީ ހަބީބަކީ “އޭޔޫ ފެހުން” ގެ ދަށުން ފަހާ މީހެއްގެ ގޮތުގައި މަސައްކަތްކުރުމަށް ވިސާ ދޫކޮށްފައިވާ މީހެކެވެ. މި ދެ މީހުން ވަނީ ރާއްޖޭގެ އާންމު ސިއްހަތު ރައްކާތެރިކުރުމުގެ ގާނޫނާއި، ކުނި މެނޭޖުކުރުމުގެ ގާނޫނާއި، އިމިގްރޭޝަން ގާނޫނުގެ އިތުރުން ވަޒީފާއާބެހޭ ގާނޫނާ ޚިލާފަށް އަމިއްލައަށް ކުނި ނަގައި އުކާލުމުގެ މަސައްކަތްކޮށްފައެވެ.
މި މައްސަލައިގައި ޝާމިލުވާ ދެ ބިދޭސީންނާމެދު އިމިގްރޭޝަން ގާނޫނުގެ ދަށުން ފިޔަވަޅު އެޅުމަށްޓަކައި، އެ މީހުން މިހާރު ވަނީ މޯލްޑިވްސް އިމިގްރޭޝަނާ ހަވާލުކޮށްފައެވެ. ދިވެހިރާއްޖޭގައި މަސައްކަތްކުރުމަށް ދޫކޮށްފައިވާ ވިސާގައި ބަޔާންކޮށްފައިވާ މަސައްކަތުގެ އިތުރުން އެހެނިހެން މަސައްކަތްތައް ކުރުމަކީ ގާނޫނީ ގޮތުން މަނާކަމަކަށްވާއިރު، ގަވާއިދާ ޚިލާފަށް އުޅޭ ބިދޭސީން ހޯދައި ފިޔަވަޅު އެޅުމުގެ މަސައްކަތް ކަމާބެހޭ އިދާރާތަކުން ދަނީ ކުރަމުންނެވެ.
ކިޔުންތެރިންގެ ހިޔާލު