މާލޭގެ ގ. ފުންފަޅު ގޭގައި ރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން، އެ އިމާރާތުގައި ދިރިއުޅޭ 58 މީހަކަށް އިވެކުއޭޝަން ސެންޓަރު މެދުވެރިކޮށް ނެޝަނަލް ޑިޒާސްޓާ މެނޭޖުމަންޓް އޮތޯރިޓީން އެހީތެރިކަން ފޯރުކޮށްދީފިއެވެ.
ރޭ 10:49 ހާއިރު އެ ގޭގައި އަލިފާން ރޯވެގެން އެމްއެންޑީއެފަށް ރިޕޯޓުކުރުމާއެކު، ސިފައިން ވަނީ އެ ސަރަހައްދަށް ގޮސް ހަރަކާތްތެރިވާން ފަށާފައެވެ. ގާތްގަނޑަކަށް ގަޑިއިރެއްހާއިރުގެ މަސައްކަތުން، ރޭ 11:48 ހާއިރު އަލިފާންގަނޑު ވަނީ އެއްކޮށް ކޮންޓްރޯލްކޮށްފައެވެ. މި ހާދިސާގައި އަލިފާން ރޯވެފައިވަނީ އެ ގޭގެ ފަސްވަނަ ފަންގިފިލާގައެވެ. އަލިފާނުގެ ސަބަބުން އެ ފަންގިފިލާގައި ހުރި ހިފާގެންގުޅޭ ހުރިހާ ސާމާނެއް ވަނީ ބޭނުންނުކުރެވޭ ވަރަށް އަނދާ ހުލިވެފައެވެ.
އަލިފާނުގެ ހާދިސާއާ ގުޅިގެން މީހުންނަށް އެހީތެރިކަން ފޯރުކޮށްދިނުމަށްޓަކައި ގަލޮޅު މަދަރުސާގައި ވަނީ ވަގުތީ އިވެކުއޭޝަން ސެންޓަރެއް ގާއިމުކޮށްފައެވެ. އެންޑީއެމްއޭއިން މައުލޫމާތު ދީފައިވާ ގޮތުގައި، އެ ސެންޓަރު މެދުވެރިކޮށް އެހީތެރިކަން ފޯރުކޮށްދިން 58 މީހުންގެ ތެރޭގައި ހިމެނެނީ 24 ފިރިހެނުންނާއި 30 އަންހެނުންގެ އިތުރުން 4 ކުޑަކުދިންނެވެ. އަދި އަލިފާން ރޯވި ފަންގިފިލާގެ ތިން އެޕާޓުމަންޓަކަށާއި، ފެންވައިރުގެ މައްސަލަ ދިމާވެގެން ފެން ނުލިބޭ އެޕާޓުމަންޓުތަކުގައި ދިރިއުޅޭ މީހުންނަށް ވަގުތީ ބޯހިޔާވަހިކަމާއި ކެއުމުގެ އިންތިޒާމު ވަނީ ހަމަޖައްސައިދީފައެވެ.
އިމާރާތުގައި ބޯކޮށް ދުން އުފެދުމުގެ ސަބަބުން ދުމުގެ އަސަރުކޮށްގެން 25 މީހަކަށް އައިޖީއެމްއެޗްގައި ފަރުވާ ދީފައިވާއިރު، އިތުރު 3 މީހަކަށް އޭޑީކޭ ހޮސްޕިޓަލުގައި ވަނީ ފަރުވާދީފައެވެ. މި ހާދިސާގައި އެއްވެސް މީހެއްގެ ފުރާނައަށް ނުރައްކާވާ ފަދަ ބޮޑު އަނިޔާއެއް ލިބިފައިނުވި ނަމަވެސް، މުދަލަށާއި އިމާރާތަށް ވަނީ ބޮޑެތި ގެއްލުންތަކެއް ލިބިފައެވެ. އަލިފާން ރޯވާން މެދުވެރިވި ސީދާ ސަބަބެއް މިހާތަނަށް ކަށަވަރުކުރެވިފައި ނުވާއިރު، ކަމާބެހޭ ފަރާތްތަކުން ދަނީ މި މައްސަލަ އިތުރަށް ތަހުގީގުކުރަމުންނެވެ.
ކިޔުންތެރިންގެ ހިޔާލު