ހައުސިންގެ ގިނަ މަޝްރޫޢުތަކުގެ އަމަލީ މަސައްކަތްތައް 2028 ވަނަ އަހަރުގެ މެދުތެރެއަށް ނިމޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް އޮފީހުގައި ނޫސްވެރިންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ އެކި ހިސާބުތަކުގައި ހައުސިންގެ ގިނަ މަސައްކަތްތަކެއް ކުރިއަށްދާކަމަށެވެ. އަދި ސަރުކާރުގެ އަމާޒަކީ މިދައުރުގައި މަޝްރޫޢުތައް ނިންމުންކަމަށްވެސް ރައީސް ވިދާޅުވިއެވެ. ރައީސް ވިދާޅުވީ ހައުސިން މަޝްރޫޢުތަކުގައި މިއަހަރު ބޮޑެތި ކުރިއެރުންތަކެއް ފެންނާނެކަމަށާއި، ބައެއް ރަށްރަށުގެ ހައުސިން މަޝްރޫޢުތަކުގެ އަމަލީ މަސައްކަތް އަންނަ އަހަރު ނިމޭނެކަމަށެވެ.
މީގެކުރިން އެއްވެސް ސަރުކާރަކުން ފެށި ހައުސިން މަޝްރޫޢެއް އެ ދައުރުގެ ތެރޭގައި ނިންމިފައި ނުވާކަން ފާހަގަކުރައްވައި ރައީސް ވިދާޅުވީ އެމަނިކުފާނުގެ އަމާޒަކީ އެކަން ބަދަލުކުރެއްވުންކަމަށެވެ.
މިސާލަކަށް އިންޑިއާ އަދި ޗައިނާ ސަރުކާރު، މި ގުޅުމުގެ ތެރެއިން މަސައްކަތް ކުރަނީ އިތުރު މަޝްރޫޢުތައް ފެށުމަށް. އަމަލީ ގޮތުން ފްލެޓް އެޅުމުގައި މި އަހަރު ތެރޭގައި އިތުރު ކުރިއެރުންތައް ފެނިގެންދާނެ.
ރައީސުލްޖުމްހޫރިއްޔާ ވިދާޅުވިއެވެ.
ސަރުކާރު ވެރިކަމަށް އައި އިރު އެކި ރަށްރަށުގައި ހުއްޓިފައި ހުރި މަޝްރޫޢުތައް އަލުން ފަށައިގެން މިހާރު ކުރިއަށް ގެންދާކަމަށާއި، އައު ފައިނޭންސިން މޮޑެލްތަކާއެކު އިތުރު ހައުސިން މަޝްރޫޢުތަކުގެ މަސައްކަތްވެސް ކުރިއަށްދާކަމަށް ރައީސް ވިދާޅުވިއެވެ. ރައީސް ވަނީ ބޭންކް އޮފް މޯލްޑިވްސްގެ ފައިނޭންސްގެ ތެރެއިން ރާއްޖޭގެ 13 ރަށެއްގައި ހައުސިން މަޝްރޫޢުތައް ހިންގަން ހަވާލުކޮށްފައިވާކަން ފާހަގަކުރައްވާފައެވެ. މިހާރު އެ މަޝްރޫޢުތަކަށް ބޭނުންވާ އެޑްވާންސް ފައިސާ ހަމަޖައްސާދީ، އަމަލީ މަސައްކަތް ފަށަން ތައްޔާރުވެފައިވާ ކަމަށް ރައީސް ވިދާޅުވިއެވެ. އަދި ބީއެމްއެލް ފައިނޭންސިންގެ ދަށުން ހުޅުމާލެ އާއި ވިލިމާލޭގައި ބިންގާ އަޅާފައިވާ މަޝްރޫޢުގެ އަމަލީ މަސައްކަތް އަންނަ މަހު ފަށާނެކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު