މޯލްޑިވްސް މަނިޓަރީ އޮޓޯރިޓީ (އެމްއެމްއޭ) އިން މަތީ ތައުލީމު ހާސިލުކުރުމަށް ހުޅުވާލާފައިވާ ސްކޮލަޝިޕްތަކަށް ކުރިމަތިލުމުގެ މުއްދަތު އަންނަ ޖުލައި މަހުގެ 15 ވަނަ ދުވަހާ ހަމައަށް އިތުރުކޮށްފިއެވެ.
އެމްއެމްއޭއިން ހުޅުވާލާފައިވާ މި ސްކޮލަޝިޕް ޕްރޮގްރާމްގެ ދަށުން ބެޗްލާސް ޑިގްރީ، މާސްޓާސް ޑިގްރީ އަދި ޕީއެޗްޑީ ފެންވަރަށް މެލޭޝިޔާގެ މަޝްހޫރު ޔުނިވާސިޓީތަކުން ކިޔެވުމުގެ ފުރުސަތު ވަނީ ފަހިކޮށްދީފައެވެ. މި އަހަރު ކިޔެވުމަށް ހަމަޖެހިފައިވާ މައިގަނޑު ދާއިރާތަކުގެ ތެރޭގައި އެކައުންޓިން ދާއިރާއިން ފުރަތަމަ ޑިގްރީ، ގާނޫނީ އަދި އިގްތިސާދީ ދާއިރާއިން މާސްޓާސް ޑިގްރީގެ އިތުރުން އިސްލާމިކް ފައިނޭންސް ދާއިރާއިން ޕީއެޗްޑީ ހާސިލުކުރުން ހިމެނެއެވެ. ކުރިން މި ސްކޮލަޝިޕްތަކަށް ކުރިމަތިލުމުގެ ސުންގަޑި އަވަހަށް ހަމަވާ ގޮތަށް އޮތް ނަމަވެސް، އެ މުއްދަތު މިހާރު ވަނީ ޖުލައި 15 އަށް އިތުރުކޮށްފައެވެ.
ސްކޮލަޝިޕަށް މީހުން ހޮވުމުގައި މައިގަނޑު ގޮތެއްގައި ބަލާނީ ކެންޑިޑޭޓުންގެ ތައުލީމީ ފެންވަރަށާއި، ކަނޑައެޅިފައިވާ ޝަރުތުތައް ފުރިހަމަވާ މިންވަރަށެވެ. އަދި ސްކޮލަޝިޕް ޔަގީންވާނީ ކިޔަވަން ހުށަހަޅާ ޔުނިވަސިޓީތަކުން އެޑްމިޝަން ކަށަވަރުވުމުން ކަމަށް އެމްއެމްއޭއިން ބުނެފައިވެއެވެ.
މި ޕްރޮގްރާމްގެ ދަށުން ހޮވޭ ދަރިވަރުންގެ ޓިއުޝަން ފީއާއި ޔުނިވާސިޓީއަށް ދައްކަންޖެހޭ އެހެނިހެން ހުރިހާ ފީތަކެއް އެމްއެމްއޭއިން ހަމަޖައްސައިދޭނެއެވެ. މީގެ އިތުރުން ކިޔަވަން ހުންނަ މުއްދަތުގައި ދިރިއުޅުމުގެ ހަރަދާއި، ފޮތް ގަތުމަށް ދޭ އެލަވަންސާއި، އެސްޓެބްލިޝްމަންޓް އަދި ޑިޕާޗާ އެލަވަންސް ލިބޭނެއެވެ. އަދި ދަރިވަރުންގެ ވިސާ ހަރަދާއި ހެލްތު އިންޝުއަރެންސް ވެސް މި ސްކޮލާޝިޕްގެ ދަށުން ހަމަޖައްސައިދިނުމަށް ވަނީ ނިންމާފައެވެ.
ކިޔުންތެރިންގެ ހިޔާލު