ސިނގިރޭޓަކުން ނަގާ ޑިއުޓީ 4 ރުފިޔާއަށް ކުޑަކުރުމަށް އެކްސްޕޯޓް އިމްޕޯޓްގެ ގާނޫނަށް ގެންނަންޖެހޭ އިސްލާހުތައް ރައްޔިތުންގެ މަޖިލީހަށް ހުށަހަޅައިފިއެވެ.
ސަރުކާރުގެ ފަރާތުން ކޮމަންޑޫ ދާއިރާގެ މެންބަރު މުހައްމަދު އިބްރާހީމް މި އިސްލާހު ހުށަހެޅުއްވީ ދުންފަތުގެ އިސްތިއުމާލުކުރުން މަދުކުރުމަށާއި، އެކަމުން ދުރުވުމަށް މަސައްކަތްކުރާ ފަރާތްތަކަށް ލުއިފަސޭހަ ކޮށްދިނުމުގެ ގޮތުންނެވެ. މި އިސްލާހުގައިވާ ގޮތުން ސިނގިރޭޓަކުން ނަގާ ޑިއުޓީ 4 ރުފިޔާއަށް ކަނޑައެޅުމުގެ އިތުރުން، އެޑްވެލޮރަމް ޑިއުޓީގެ ގޮތުގައި 30 އިންސައްތަ ނެގުމަށް ވަނީ ހުށަހަޅާފައެވެ. މީގެ އިތުރުން، ދުންފަތާ ދުރުވުމަށް ބޭނުންކުރާ ނިކޮޓިން ޗުއިންގަމް، ނިކޮޓިން ޕެޗް އަދި އެފަދަ އެހެނިހެން އުފެއްދުންތަކުން ޑިއުޓީ މާފުކުރުމަށްވެސް މި ބިލުގައި ހިމަނާފައިވެއެވެ.
މި އިސްލާހުގެ ދަށުން ހަމައެކަނި އާދައިގެ ސިނގިރޭޓުގެ ޑިއުޓީއެއް ނޫން، ބިޑިއާއި ހީޓަޑް ޓޮބޭކޯ ޕްރޮޑަކްޓްސް ނުވަތަ ރޯކުރުމަކާ ނުލާ ހޫނުކޮށްގެން ބޭނުންކުރާ ދުންފަތުގެ ބާވަތްތަކުން ނަގާ ޑިއުޓީވެސް 4 ރުފިޔާއަށް ކުޑަކުރުމަށް ވަނީ ހުށަހަޅާފައެވެ. މިއީ ދުންފަތުގެ އުފެއްދުންތަކުން ނަގާ ޓެކްސްގެ އޮނިގަނޑު ހަރުދަނާކޮށް، ސިއްހީ ގޮތުން ރައްކާތެރިކަން އިތުރުކުރުމަށް އެޅޭ ފިޔަވަޅެއްގެ ގޮތުގައި ސަރުކާރުން ދެކެއެވެ.
މީގެ ކުރިން 3.30 ރުފިޔާއަށް ނަގަމުން އައި ސިނގިރޭޓުގެ ޑިއުޓީ، 2024 ވަނަ އަހަރުގެ ނޮވެމްބަރު މަހު ސަރުކާރުން ވަނީ 8 ރުފިޔާއަށް ބޮޑުކޮށްފައެވެ. ނަމަވެސް، މިހާރު މި ހުށަހަޅާ އިސްލާހާއެކު އަލުން ޑިއުޓީ ކުޑަކުރުމަށް މަސައްކަތް ފެށިފައިވާއިރު، މިކަމާ ގުޅޭގޮތުން ދުނިޔޭގެ ސިއްހަތު ޖަމްއިއްޔާގެ ލަފަޔާ އެއްގޮތަށް ބަދަލުތައް ގެނައުމަށް ރަސްމީ މަޝްވަރާތައް ފެށުމަށް ތައްޔާރުވެފައިވާކަން މޭއި މަހު ސަރުކާރުން ހާމަކޮށްފައިވެއެވެ. މި ބިލުގެ ފުރަތަމަ ކިޔުން މާދަމާ މަޖިލީހުގައި އޮންނާނެއެވެ.
ކިޔުންތެރިންގެ ހިޔާލު