މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ގައުމީ ސެކްރެޓޭރިއަޓުގައި “ބޮޑު ބަދަލު” އޮފީސް ގާއިމުކޮށް، އެ އޮފީހުގެ ޑިރެކްޓާ ޖެނެރަލްގެ މަގާމަށް އެ ޕާޓީގެ ކުރީގެ ޗެއާޕާސަން ހަސަން ލަތީފް މިއަދު އައްޔަނުކޮށްފި އެވެ.
“ބޮޑު ބަދަލު” އަކީ ދިވެހިރާއްޖޭގެ ވެރިކަން ހިންގާ ނިޒާމަށް ބޮޑެތި ބަދަލުތަކެއް ގެނައުމަށް އެމްޑީޕީގެ އިސް ފަރާތްތަކުން ހުށަހަޅާފައިވާ ނިޒާމީ އިސްލާހުތަކެކެވެ. މި އިސްލާހުތަކަކީ ކުރީގެ ރައީސް މުހައްމަދު ނަޝީދާއި އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް އިސްވެ ތިއްބަވައިގެން އެކުލަވާލެއްވި ޚިޔާލުތަކެކެވެ. މި ނިޒާމު ހިންގުމަށް ހާއްސަ އޮފީހެއް ހުޅުވައި، ހަސަން ލަތީފް އެ މަގާމަށް އައްޔަނުކުރީ މި މަސައްކަތްތައް ހަރުދަނާކޮށް ކުރިއަށް ގެންދިއުމުގެ ބޭނުމުގަ އެވެ.
މި ނިޒާމަކީ ރިޔާސީ ނުވަތަ ބަރުލަމާނީ ނިޒާމުގެ ހަމަތަކުން އެކީ އެކައްޗަކަށް ފެތޭ ނިޒާމެއް ނޫނެވެ. މީގެ މައިގަނޑު ސިފައަކީ ސަރުކާރު ހިންގާ ވެރިޔާ ރައްޔިތުންގެ ވޯޓަކުން އިންތިހާބު ކުރުމާއި، ދައުލަތުގެ ވެރިޔާ މަޖިލީހާއި ކައުންސިލަރުންގެ ވޯޓުން އިންތިހާބުކޮށް ބާރުތައް ބެހިގެން ދިއުމެވެ. މިގޮތުން ބާރުތައް ބަހާލައިގެން ހިންގުމަކީ ދައުލަތުގެ ކަންކަން ހަރުދަނާ ކުރެވޭނެ ގޮތެއް ކަމަށް މި ނިޒާމު ހުށަހެޅުއްވި ފަރާތްތަކުން ދެކެ އެވެ.
މިފަދަ ހައިބްރިޑް ނިޒާމަކާމެދު ސިޔާސީ މަސްރަހުގައި ބޮޑެތި ކަންބޮޑުވުންތަކެއް އެބަހުއްޓެވެ. ފާޑުކިޔާ ފަރާތްތަކުން ދެކޭ ގޮތުގައި ދައުލަތުގެ ދެ ވެރިންގެ މެދުގައި ބާރުތައް ބެހިގެން ދިއުމަކީ ހިޔާލުތަފާތުވުންތައް އުފެދި، ދައުލަތް ހިންގުން ހުއްޓުމަކަށް އައުމުގެ ފުރުސަތު ބޮޑު ކަމެކެވެ. މީގެ އިތުރުން ފަނޑިޔާރުންނާއި މިނިވަން ކޮމިޝަންތަކުގެ މެންބަރުން ވަކިކުރުމަށް ސީދާ ރައްޔިތުންގެ ރުހުން ހޯދަންޖެހުމާއި، މެންބަރުން ރިކޯލް ކުރެވޭ ގޮތް ހެދުމަކީ ދައުލަތުގެ ހަރަދުތައް ބޮޑުވެ، ސިޔާސީ ދެބަސްވުންތައް ދާއިމީ ކަމަކަށް ވެދާނެ ކަމުގެ ބިރު އޮތް ކަމަށް މާހިރުން އަންދާޒާ ކުރެ އެވެ.
ކިޔުންތެރިންގެ ހިޔާލު