ފުވައްމުލަކު އެއާޕޯޓު ސަރަހައްދުގައި ބޭންކް އޮފް މޯލްޑިވްސްގެ އާ ސެލްފް ސަރވިސް އޭޓީއެމް ސެންޓަރެއް ގާއިމުކޮށް، އެ ސިޓީގައި ދެމުންގެންދާ ބޭންކިންގ ޚިދުމަތް އިތުރަށް ފުޅާކޮށްފިއެވެ.
ބޭންކް އޮފް މޯލްޑިވްސް (ބީއެމްއެލް) އިން ފުވައްމުލަކު ސިޓީގައި ހުޅުވި މި އޭޓީއެމް ސެންޓަރަކީ އެ ރަށުގައި ގާއިމުކުރެވުނު 4 ވަނަ އޭޓީއެމްއެވެ. މިއާއެކު، އަމިއްލަ ރަށުގައި ތިބެގެން ފައިސާގެ މުއާމަލާތްތައް ފަސޭހަކަމާއެކު ކުރުމުގެ ފުރުސަތު އެ ސިޓީގެ ރައްޔިތުންނަށް ވަނީ އިތުރަށް ތަނަވަސްވެފައެވެ. ސެލްފް ސަރވިސް ބޭންކިންގ އޭޓީއެމްގެ ޚިދުމަތަކީ މާލެއާއި ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންގެ ފަރާތުން ބޮޑު ތަރުހީބެއް ލިބެމުންދާ ޚިދުމަތެއްކަމަށް ބީއެމްއެލްއިން ފާހަގަކުރެއެވެ. އަދި މިދިޔަ އަހަރުގެ ތެރޭގައި އެ ސިޓީގައި ޑޮލަރު އޭޓީއެމްގެ ޚިދުމަތްވެސް ވަނީ ފަށާފައެވެ.
ރާއްޖޭގެ ހުރިހާ ރަށެއްގައި އޭޓީއެމް ގާއިމުކުރުމަށް ސަރުކާރުން ފަށާފައިވާ “މުޅި ރާއްޖެއަށް ބީއެމްއެލް އޭޓީއެމް” މަޝްރޫޢުގެ ދަށުން ބޮޑެތި ކާމިޔާބީތަކެއް ވަނީ ހޯދާފައެވެ. މިދިޔަ އަހަރުގެ ފެބްރުއަރީ މަހު ފެށި މި މަޝްރޫޢުގެ ދަށުން އެންމެ 9 މަސްދުވަހުގެ ތެރޭގައި 20 އަތޮޅެއްގެ 105 ރަށެއްގައި އޭޓީއެމް ބަހައްޓައި ނިންމާފައިވެއެވެ. މިއީ ރާއްޖޭގެ ތާރީޚުގައިވެސް ބޭންކިންގ ޚިދުމަތް މިހާ ހަލުވި މިނެއްގައި ފުޅާކުރެވުނު ފުރަތަމަ ފަހަރުކަމަށް ބީއެމްއެލްއިން މައުލޫމާތުދެއެވެ. އަމިއްލަ ރަށުގައި ތިބެގެން ފައިސާގެ މުއާމަލާތްތައް ކުރުމަކީ އާބާދީ ކުދި ރަށްރަށުގެ ރައްޔިތުން ވަރަށް ބޮޑަށް އެދެމުންދިޔަ ކަމަކަށްވާއިރު، މި މަޝްރޫޢުގެ ސަބަބުން އެކަން ވަނީ ހަގީގަތަކަށް ވެފައެވެ.
އާބާދީގައި 2000 އަށްވުރެ ގިނަ މީހުން ދިރިއުޅޭ ކޮންމެ ރަށެއްގައި ޑޮލަރު އޭޓީއެމް ބެހެއްޓުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެވަޑައިގެންފައިވާ ވައުދުފުޅާ އެއްގޮތަށް އެ މަސައްކަތްވެސް ދަނީ ހަލުވިކަމާއެކު ކުރިއަށެވެ. އެގޮތުން، ފާއިތުވި ކުޑަ ދުވަސްކޮޅެއްގެ ތެރޭގައި 70 ރަށެއްގައި ޑޮލަރު އޭޓީއެމް އަދި 20 ރަށެއްގައި ދިވެހި ރުފިޔާ އޭޓީއެމް ވަނީ ބަހައްޓާފައެވެ. މީގެ އިތުރުން 6 ރަށެއްގައި އައު ބްރާންޗްތައް ގާއިމުކޮށް، ރައްޔިތުންނަށް ބޭނުންވާ މާލީ ޚިދުމަތްތައް ފޯރުކޮށްދިނުން ބީއެމްއެލްއިން ވަނީ އިތުރަށް ހަރުދަނާކޮށްފައެވެ.
ކިޔުންތެރިންގެ ހިޔާލު